آئی پی ایل 2026 میں چنئی سپر کنگس (سی ایس کے) کو گزشتہ تینوں مقابلوں میں شکست کا سامنا کرنا پڑا ہے۔ بنگلورو کے ایم چناسوامی اسٹیڈیم اتوار (5 اپریل) کو کھیلے گئے مقابلہ میں رائل چیلنجرس بنگلورو (آر سی بی) نے 250 رنوں کا پہاڑ جیسا اسکور کھڑا کر سی ایس کے کو 19.4 اوورس میں 207 رنوں پر آل آؤٹ کر دیا۔ گزشتہ تینوں مقابلوں میں سی ایس کے لیے اچھی بات یہ رہی کہ سرفراز خان بہترین فارم میں چل رہے ہیں۔ کل کے مقابلہ میں انہوں نے صرف 25 گیندوں کا سامنا کرتے ہوئے 8 چوکے اور 2 چھکوں کی مدد سے 50 رنوں کی بہترین اننگ کھیلی۔
واضح رہے کہ سرفراز خان نے رائل چیلنجرس بنگلورو کے خلاف پہلے 6 اوورس میں ہی اپنی نصف سنچری مکمل کر لی تھی۔ ایسے میں وہ آئی پی ایل کی تاریخ میں پہلے 6 اوورس میں نمبر 4 یا اس سے نیچے بلے بازی کرتے ہوئے نصف سنچری اسکور کرنے والے پہلے بلے باز بن گئے ہیں۔ سرفراز خان کے علاوہ کسی اور کھلاڑی نے آئی پی ایل میں اب تک یہ کارنامہ نہیں کیا ہے۔ سرفراز خان نے 200 کے اسٹرائک ریٹ سے بلے بازی کرتے ہوئے رائل چیلنجرس بنگلورو کے خلاف 25 گیندوں میں 50 رن بنائے۔
قابل ذکر ہے کہ آئی پی ایل 2026 کے ’مِنی آکشن‘ میں سرفراز خان پہلے راؤنڈ میں کسی نے نہیں خریدا تھا۔ لیکن اس کے بعد ’ایکسلریٹڈ راؤنڈ‘ میں چنئی سپر کنگس نے سرفراز خان کو 75 لاکھ روپے میں خریدا۔ آر سی بی کے خلاف کھیلی گئی نصف سنچری سے قبل بھی سرفراز خان نے 12 گیندوں میں 32 رن کی طوفانی اننگ کھیلی تھی۔
28 سالہ سرفراز خان نے 2015 میں آئی پی ایل میں ڈیبیو کیا تھا۔ اس کے بعد سے اب تک انہوں نے آئی پی ایل میں 53 میچ کھیلے ہیں۔ 137.6 کے اسٹرائک ریٹ سے بلے بازی کرتے ہوئے 684 رن بنائے ہیں۔ سرفراز اب تک آئی پی ایل میں 2 نصف سنچری بنا چکے ہیں۔ واضح رہے کہ سرفراز خان نے آئی پی ایل میں سی ایس کے علاوہ رائل چیلجنرس بنگلورو، پنجاب کنگس اور دہلی کیپیٹلس کی بھی نمائندگی کی ہے۔
