امریکہ، اسرائیل اور ایران کے درمیان جاری بھیانک جنگ کے سبب پوری دنیا میں کھلبلی مچی ہوئی ہے۔ اس دوران خلیجی ممالک کے ساتھ ساتھ امریکہ، اسرائیل اور ایران کے درمیان کشیدگی کے اثرات اب ہندوستان میں بھی پوری طرح محسوس کیے جا رہے ہیں۔ موجودہ صورتحال میں کئی طرح کے الزامات کا سامنا کررہی مودی حکومت نے بڑی پیش رفت کرتے ہوئے ایران سے رابطہ کیا ہے۔
خبروں کے مطابق وزیرِ خارجہ ایس جے شنکر نے ایران کے اپنے ہم منصب سید عباس عراقچی سے ٹیلی فونی گفتگو کی ہے جس میں علاقائی تغیّرات کے بارے میں تفصیلی سے تبادلۂ خیال کیا گیا ہے۔ اس سلسلے میں وزیر خارجہ ایس جے شنکر نے سوشل میڈیا پلیٹ فارم ’ایکس‘ پر ایک پوسٹ کرکے اس بارے میں جانکاری دی۔ وزیر خارجہ نے اپنی پوسٹ میں لکھا کہ آج شام ایران کے وزیرخارجہ سے تفصیلی بات چیت ہوئی جس میں جاری تنازع کے حوالے سے تازہ ترین پیش رفت پرگفتگو ہوئی اورمستقبل میں بھی ہم نے رابطے میں رہنے پر اتفاق کیا۔
ایران کے سرکاری خبررساں ادارے ’ارنا‘ کے مطابق ہندوستان اور ایران کے وزرائے خارجہ کے درمیان گفتگو میں اسلامی جمہوریہ ایران کے وزیرِ خارجہ نے گزشتہ 11 دن کے دوران ایران کے میناب شہر میں واقع لڑکیوں کے پرائمری اسکول پر میزائل حملے اور غیر فوجی مقامات اورعوامی خدمات کے مراکز پر ہونے والے وسیع حملوں سمیت، ایرانی عوام پر کی گئی امریکی اور اسرائیلی جارحیت سے ہندوستانی وزیرِ خارجہ کو آگاہ کیا۔
’ارنا‘ کے مطابق ایرانی وزیر خارجہ نے اس کے ساتھ ہی ایرانی عوام کے بھرپور دفاع کے تہران کے عزم پر تاکید کی۔ سید عباس عراقچی نے امریکہ اور غاصب اسرائیل کی جارحانہ کارروائی کو اقوام متحدہ کے منشور کے بنیادی اصولوں اور بین الاقوامی قوانین کی خلاف ورزی قرار دیا اور کہا کہ تمام حکومتوں کی ذمہ داری ہے کہ وہ اس کھلّم کھلّا فوجی جارحیت اور قانون شِکنی کی مذمت کریں۔ دونوں ملکوں کے وزرائے خارجہ نے جہازرانی اور آبنائے ہُرمُز سے گزرنے والے جہازوں کی سیکورٹی پر پڑنے والے امریکہ اور اسرائیل کی فوجی جارحیت کے نتائج کے بارے میں بھی بات چیت کی۔
