مغربی بنگال کے مشرقی بردمان میں قومی شاہراہ 19 پر مسافروں سے بھری ایک بس اور ٹریکٹر ٹرالی کے درمیان خوفناک ٹکر ہو گئی۔ اس دردناک حادثہ میں بہار کے 11 افراد جاں بحق ہو گئے۔ اس معاملے میں بہار کے وزیر اعلیٰ نتیش کمار کا تعزیتی پیغام سامنے آیا ہے۔ انھوں نے اس حادثہ کو افسوسناک بتایا اور اظہارِ غم کرتے ہوئے متاثرہ کنبوں کے لیے معاوضہ کا اعلان بھی کیا۔وزیر اعلیٰ نے بہار کے ہلاک شدگان کی فیملی کو وزیر اعلیٰ راحت فنڈ سے 2-2 لاکھ روپے اور زخمیوں کو 50-50 ہزار روپے امداد فراہم کرنے کی ہدایت جاری کر دی ہے۔ وزیر اعلیٰ نے اس حادثہ میں زخمی لوگوں کے جلد صحت یاب ہونے کی دعا بھی کی ہے۔ انھوں نے افسران کو ہدایت دی کہ مہلوکین کے جسد خاکی کو ان کے گھروں تک پہنچانے اور زخمیوں کے بہتر علاج کے لیے مغربی بنگال حکومت سے رابطہ قائم کر مناسب کارروائی کریں۔
واضح رہے کہ جمعہ کی صبح مغربی بنگال کے بردمان میں جب مسافر بس اور ٹریکٹر ٹرالی کی ٹکر ہوئی تو ہر طرف چیخ و پکار مچ گئی تھی۔ اس حادثہ میں جن 11 لوگوں کی موت ہوئی، وہ سبھی بہار سے تعلق رکھتے تھے۔ حادثہ میں تقریباً 35 افراد زخمی بھی ہوئے ہیں۔ سبھی زخمیوں کو بردمان میڈیکل کالج و اسپتال میں داخل کرایا گیا ہے۔ بتایا جا رہا ہے کہ مسافر بس سڑک کے کنارے کھڑے ایک ٹرک سے ٹکرا گئی۔ بس میں سوار لوگ گنگا ساگر میں غسل کر کے واپس لوٹ رہے تھے۔ بس درگاپور کی طرف جا رہی تھی۔
موصولہ اطلاع کے مطابق ٹکر اس قدر شدید تھی کہ بس کا اگلا حصہ پوری طرح سے ٹوٹ پھوٹ گیا۔ واقعہ کے بعد موقع پر چیخ و پکار کا عالم پیدا ہو گیا۔ وہاں موجود لوگوں نے فوری طور پر راحت و بچاؤکاری کا عمل شروع کر دیا۔ پولیس کو بھی فوراً اطلاع دی گئی۔ بعد ازاں پولیس اور مقامی انتظامیہ نے مل کر راحت رسانی کا کام شروع کر دیا۔
