کولکاتا : جنوب-مغربی کولکاتا کے خضر پور میں ایک بھیڑ بھاڑ والے بازار میں پیر کی صبح شدید آگ لگ گئی۔ اس آتشزدگی میں 400 سے زیادہ دکانیں جل کر پوری طرح خاک ہو گئیں۔ آگ کے شعلے اتنے تیز تھے کہ کچھ ہی منٹوں میں پورا بازار دھوئیں کے غبار کی آغوش میں آ گیا۔ اس سے پورے علاقے میں افرا تفری پھیل گئی۔عینی شاہدین کے مطابق اتوار-سوموار کی رات 2:05 بجے آگ کی پہلی لپٹیں دیکھی گئیں۔ بھیڑ بھاڑ والے اس بازار میں زیادہ تر دکانیں آپس میں لگی ہوئی تھیں، جس سے آگ نے تیزی سے خوفناک شکل اختیار کر لی۔ دکانوں میں رکھے کپٹے، پلاسٹک اور دیگر آتش گیر اشیا نے آگ کو مزید بھڑکا دیا۔
آتشزدگی کی اطلاع ملنے پر فائر بریگیڈ کی 20 گاڑیاں موقع پر بھیجی گئیں، جو گھنٹوں آگ پر قابو پانے کی کوشش کرتی رہیں۔ حالانکہ ابھی تک آگ پر پوری طرح سے قابو نہیں پایا جا سکا ہے۔ فائر بریگیڈ کے اہلکاروں نے بتایا کہ گھنا دھواں، رات کی تاریکی اور جلی ہوئی اشیا کے ڈھیر کی وجہ سے راحت کام میں مشکلات کا سامنا کرنا پڑ رہا ہے۔ کئی جگہوں پر آگ ابھی بھی سلگ رہی ہے، جس سے اس کے دوبارہ بھڑکنے کا خطرہ بنا ہوا ہے۔ فائربریگیڈ اہلکار آکسیجن ماسک پہن کر راحت کام میں لگے رہے۔ پولیس کے مطابق اس واقعہ میں کسی کے زخمی یا لاپتہ ہونے کی اطلاع نہیں ہے۔
اس دوران فائر سروسز کے ریاستی وزیر سجیت بسو بھی جائے وقوع پر پہنچے۔ انہوں نے بتایا کہ آگ بہت خوفناک طور پر لگی تھی۔ نقصان کا ابھی اندازہ نہیں کیا جا سکتا۔ ہم پوری طاقت سے آگ بجھانے کی کوشش کر رہے ہیں۔ سینئر انتظامی افسروں کے ساتھ مل کر حالات کا جائزہ لیا جا رہا ہے۔ جن تاجروں کی دکانیں اس حادثے میں جل کر خاک ہو گئی ہیں، وہ گہرے صدمے اور فکر میں مبتلا ہیں۔ کئی دکانداروں نے کہا کہ یہی ان کے روزگار کا واحد وسیلہ تھا اور اب وہ پوری طرح سے برباد ہو گئے ہیں۔ فی الحال آگ لگنے کی وجہ کا پتہ نہیں چل سکا ہے۔ جانچ کے حکم دے دیئے گئے ہیں۔ راحت و بچاؤ کام جاری ہے۔
