اکاؤنٹ فریز کیے جانے کے خلاف کانگریس کا ملک گیر احتجاج

نئی دہلی :کانگریس نے آج راجدھانی دہلی، اتر پردیش، مغربی بنگال، آسام، راجستھان سمیت ملک کی کئی ریاستوں میں کانگریس لیڈران و کارکنان نے پارٹی کا اکاؤنٹ فریز کیے جانے کے خلاف مظاہرہ کیا اور اسے ’ٹیکس ٹیررزم‘ قرار دیا۔ دہلی میں خاص طور سے یوتھ کانگریس صدر سرینواس بی وی کی قیادت میں احتجاجی مظاہرہ کیا گیا۔ اس موقع پر سرینواس نے کہا کہ مودی حکومت ملک کی اہم اپوزیشن پارٹی کے بینک اکاؤنٹس کو فریز کر کے جمہوریت کو فریز کرنا چاہتی ہے، لیکن اس ناانصافی اور تاناشاہی کے خلاف ہماری جنگ جاری رہے گی۔
اتر پردیش میں کئی مقامات پر کانگریس لیڈران و کارکنان کا مظاہرہ دیکھنے کو ملا جہاں مرکزی حکومت پر انکم ٹیکس محکمہ کے ذریعے کانگریس کے خلاف غیر قانونی جنگ شروع کرنے کا الزام عائد کیا گیا۔ ساتھ ہی اس سلسلے میں صدر جمہوریہ کو ایک میمورینڈم بھی بھیجا گیا۔ اس میں مطالبہ کیا گیا ہے کہ بی جے پی حکومت کے اشارے پر آئینی اداروں کے ذریعہ اپوزیشن پارٹیوں پر کیے جا رہے حملے بند کیے جائیں۔ اس عرضداشت میں لوک سبھا انتخاب کو متاثر کرنے کی کوششوں پر قدغن لگانے اور ملک میں صحت مند جمہوری عمل کو زندہ رکھنے کا مطالبہ بھی کیا گیا ہے۔ یہ میمورینڈم وارانسی، پریاگ راج، گورکھپور، لکھنؤ، میرٹھ، علی گڑھ سمیت سبھی ضلع ہیڈکوارٹرس پر کانگریس لیڈران نے صدر جمہوریہ کو بھیجا۔ لکھنؤ میں ضلع کانگریس کمیٹی صدر وید پرکاش ترپاٹھی کی قیادت میں جلوس نکالنے کی کوشش بھی ہوئی، لیکن پولیس نے جلوس کے پارٹی دفتر سے چند قدم آگے بڑھتے ہی بیریکیڈنگ کر اسے روک دیا۔ ترپاٹھی نے اسی موقع پر صدر جمہوریہ کے لیے تیار میمورینڈم پولیس کمشنر کوسونپ دیا۔