مکہ مکرمہ: مکہ مکرمہ اور منی‘ عرفات اور مزدلفہ میں کمانڈ اینڈ کنٹرول سنٹر برائے حج سیکورٹی نے 8 ہزار کیمرے نصب کیے ہیں جو مصنوعی ذہانت سے لیس ہیں۔سعودی خبر رساں ادارہ العربیہ چینل کے مطابق کیمروں کو نگرانی کے لیے 500 سے زائد مقامات پر تقسیم کیا گیا ہے جس کا مقصد حج موسم کے دوران بہتر سے بہتر سیکورٹی فراہم کرنا ہے۔اسی طرح دیگر حصوں میں بھی کیمرے نصب کئے گئے ہیں جہاں سے عازمین حج کی مختلف جگہوں پر آمد ورفت کی مانیٹرنگ ہوسکے گی۔جس کے بعد مکہ مکرمہ اورمشاعر مقدسہ کے ہر حصہ کی نگرانی آسان ہو جائے گی۔میڈیا سے بات کرتے ہوئے حج سیکورٹی فورسس کے ترجمان لیفٹیننٹ کرنل خالد الکریدیس کا کہنا تھا کہ کمانڈ اینڈ کنٹرول سنٹر حج سیکوریٹی فورسس کے منصوبوں کو مکمل کرتا ہے۔
الکریدیس کا کہنا تھا کہ مرکز نے جدید ترین ٹکنالوجیز کے حامل کیمروں کی تنصیب کی ہے جس کے سبب عازمین حج کی مختلف جگہوں پر آمدو رفت کو مانیٹر کیا جا سکے گا۔اُنہوں نے کہا کہ ان کیمروں کی تنصیب سے کمانڈ اینڈ کنٹرول سنٹر کا معیار بہت عمدہ اور اعلیٰ ہوگا اور بروقت تمام معاملات آسانی سے حل ہوسکیں گے۔الکریدیس کا مزید کہنا تھا کہ یہ مرکز کئی جدید تکنیکی صلاحیتوں کے حوالہ سے ممتاز ہیں کیونکہ یہ کیمرے مصنوعی ذہانت پروگرام سے لیس ہیں جو سدایا کے تعاون سے استعمال کیے جارہے ہیں۔انہوں نے کہا کہ یہ کیمرے مسجد الحرام میں سیکوریٹی آپریشن سنٹر 911 سے بھی براہ راست رابطہ میں ہوں گے تاکہ سیکورٹی کے مسائل فوری حل کئے جاسکیں۔
