مدھیہ پردیش کے اندور میں جمعہ کی صبح ایک اندوہناک سڑک حادثہ میں 3 لوگوں کی موت ہو گئی۔ مہلوکین میں مدھیہ پردیش کے سابق وزیر داخلہ اور موجودہ رکن اسمبلی بالا بچن کی بیٹی بھی ہلاک ہو گئی۔ بتایا جا رہا ہے کہ ٹرک میں کار ٹکرانے کے سبب یہ حادثہ پیش آیا۔ پولیس نے ٹرک ڈرائیور کو گرفتار کر لیا ہے اور پوچھ تاچھ کی جا رہی ہے۔ واقعہ تیجاجی نگر پولیس اسٹیشن حلقہ کا ہے اور پولیس نے معاملے کی تحقیقات شروع کر دی ہے۔
میڈیا رپورٹس کے مطابق تیجا جی نگر پولیس اسٹیشن کے انچارج دیویندر مرکام کا کہنا ہے کہ حادثہ تیجا جی نگر بائپاس پر رالامنڈل علاقہ کے قریب ہوا، جب ایک کار ٹرک سے ٹکرا گئی۔ سابق ریاستی وزیر داخلہ بالا بچن کی بیٹی پریرنا بچن اور 2 نوجوان کی اس حادثے میں موت ہو گئی۔ دونوں نوجوان کی شناخت منسندھو اور پرکھر کی شکل میں ہوئی ہے۔ ان سبھی کی جائے وقوع پر ہی موت ہو گئی۔ مرکام نے بتایا کہ کار میں سوار مزید ایک لڑکی کو سنگین حالت میں علاج کے لیے داخل اسپتال کرایا گیا ہے۔
پولیس کا کہنا ہے کہ حادثہ کی اصل وجہ کا فی الحال پتہ نہیں چل سکا ہے۔ ملزم ٹرک ڈرائیور کو پوچھ تاچھ کے لیے حراست میں لیا گیا ہے۔ ضلع کے سینئر ایڈمنسٹریٹو اور پولیس افسران نے جائے وقوع کا دورہ کر حالات کا جائزہ بھی لیا ہے۔ پولیس کے مطابق لاش کو پوسٹ مارٹم کے لیے بھیج دیا گیا ہے اور حادثہ کی جانچ شروع کر دی گئی ہے۔ مدھیہ پردیش کے سابق وزیر اعلیٰ کمل ناتھ اور حزب اختلاف کے لیڈر امنگ سنگھار نے اس حادثہ پر شدید رنج و غم کا اظہار کیا ہے۔
بتایا جا رہا ہے کہ کار میں سوار افراد اندور سے پارٹی کر گھر لوٹ رہے تھے۔ حادثہ میں کار کو بری طرح نقصان پہنچا ہے۔ اس سڑک حادثہ میں ہلاک پرکھر کے بارے میں کہا جا رہا ہے کہ وہ ریاستی کانگریس ترجمان آنند کاسلیوال کا بیٹا ہے۔ میڈیا رپورٹس کے مطابق کار پرکھر ہی چلا رہا تھا۔ اس کے یومِ پیدائش کی تقریب میں ہی پرکھر سمیت 4 افراد ایک فارم ہاؤس میں پارٹی کر اندور لوٹ رہے تھے۔
