ہاتھرس سانحہ کی تحقیقات کے لئے تین رکنی عدالتی تحقیقاتی کمیشن قائم

لکھنئو: ہاتھرس میں پیش آئے حادثے کی عدالتی تحقیقات کے لیے الہ آباد ہائی کورٹ کے ریٹائرڈ جسٹس برجیش کمار سریواستو کی صدارت میں تین رکنی عدالتی تحقیقاتی کمیشن تشکیل دیا گیا ہے۔گورنر آنندی بین پٹیل نے چہارشنبہ کی رات اس کا نوٹیفکیشن جاری کیا۔ریٹائرڈ آئی اے ایس ہیمنت راؤ اور ریٹائرڈ آئی پی ایس بھاویش کمار سنگھ کو جوڈیشل انکوائری کمیشن کا ممبر مقرر کیا گیا ہے۔ جوڈیشل انکوائری کمیشن کا ہیڈکوارٹر لکھنؤ میں ہوگا۔کمیشن اس نوٹیفکیشن کے جاری ہونے کی تاریخ سے دو ماہ کی مدت میں تحقیقات مکمل کرے گا۔ اس کی مدت میں کوئی بھی تبدیلی ریاستی حکومت کے حکم پر کی جا سکتی ہے۔
نوٹیفکیشن کے مطابق کمیشن 2 جولائی کو ہاتھرس ضلع میں پیش آنے والے واقعے کی تحقیقات کرے گا اور تحقیقات کے بعد ریاستی حکومت کو مقررہ نکات پر رپورٹ پیش کرے گا۔اس میں ضلعی انتظامیہ کی طرف سے دی گئی اجازت اور اس میں دی گئی شرائط کے ساتھ تقریب کے منتظمین کی تعمیل کی جانچ کرنا شامل ہے۔ اس کے علاوہ اس بات کی بھی تفتیش کی جائے کہ یہ واقعہ حادثہ تھا یا سازش یا کوئی اور منصوبہ بند مجرمانہ واقعہ۔اس کے علاوہ یہ بھی کمیشن کے دائرہ کار میں ہوگا کہ وہ پروگرام کے دوران ہجوم کو کنٹرول کرنے اور امن و قانون برقرار رکھنے کے لیے ضلعی انتظامیہ اور پولیس کی جانب سے کیے گئے انتظامات اور ان سے متعلق دیگر پہلوؤں کی چھان بین کرے۔کمیشن ان وجوہات اور حالات کا بھی جائزہ لے گا جن کی وجہ سے یہ واقعہ پیش آیا جبکہ کمیشن مستقبل میں ایسے واقعات کے پھر سے ہونے کو روکنے کے لیے اپنی تجاویز بھی دے گا۔قابل ذکر ہے کہ منگل کو ہاتھرس میں ستسنگ پروگرام کے دوران بھگدڑ مچ جانے سے 121 افراد ہلاک اور 35 زخمی ہو گئے تھے۔ اس معاملے میں پروگرام کے منتظم اور کچھ دوسرے لوگوں کے خلاف ایف آئی آر درج کی گئی ہے۔