گنگانگر:راجستھان کے بیشتر علاقے ایک بار پھر شدید گرمی اور لُو کی زد میں آ گئے ہیں۔ ریاست کے مختلف حصوں میں درجہ حرارت خطرناک حد تک بڑھ گیا ہے، جب کہ گنگانگر اتوار کو سب سے گرم مقام رہا جہاں زیادہ سے زیادہ درجہ حرارت 47.4 ڈگری سیلسیس ریکارڈ کیا گیا۔ یہ رواں موسم گرما کا اب تک کا سب سے زیادہ درجہ حرارت ہے۔ محکمۂ موسمیات کے مطابق ریاست میں اگلے چند دنوں تک موسم خشک اور جھلسا دینے والا رہے گا۔
محکمۂ موسمیات کی رپورٹ کے مطابق بیکانیر میں بھی درجہ حرارت 45 ڈگری سے تجاوز کر چکا ہے۔ اتوار کو بیکانیر میں 46، باڑمیر میں 45.9، چورو میں 45.6، پھلودی میں 45.4، جیسلمیر میں 45.2 اور کوٹا میں 45 ڈگری سیلسیس درجہ حرارت ریکارڈ کیا گیا۔ ان مقامات پر تیز دھوپ، گرم ہوائیں اور زمینی سطح سے بلند درجہ حرارت نے لوگوں کی مشکلات میں اضافہ کر دیا ہے۔
محکمۂ موسمیات کے مطابق آنے والے ایک ہفتے کے دوران ریاست کے بیشتر علاقوں میں موسم خشک رہے گا اور بارش کے آثار کم ہیں۔ خاص طور پر شمال مغربی راجستھان کے بیکانیر ڈویژن میں 11 جون تک درجہ حرارت 45 سے 47 ڈگری سیلسیس کے درمیان رہنے کا امکان ہے۔ کچھ مقامات پر گرمی کی شدت اور لُو چلنے کا بھی خدشہ ظاہر کیا گیا ہے۔
