پورے شمالی ہند میں شدید ٹھنڈ کا سلسلہ جاری

ملک کے پہاڑی علاقوں اور شمالی ہند میں شدید ٹھنڈ کا سلسلہ جاری ہے۔ محکمہ موسمیات نے پیر اور منگل کو کشمیر سمیت جموں ڈویژن کے اونچے پہاڑی علاقوں میں اچھی خاصی برفباری کا امکان ظاہر کیا ہے۔ 6 جنوری کو ہماچل پردیش کے اونچے علاقوں میں برفباری اور نچلے علاقوں میں بارش کے لیے آرینج الرٹ جاری کیا گیا ہے۔
پہاڑوں پر فعال ‘ویسٹرن ڈسٹربینس’ کی وجہ سے اب مغربی ہوائیں مشرق کی طرف بڑھنے والی ہیں جس سے درجہ حرارت میں اضافہ ہو سکتا ہے۔ ‘ویسٹرن ڈسٹربینس’ کے اثر سے اتر پردیش کے مراد آباد، سنبھل، امروہا، رام پور اور بجنور ضلعوں میں بارش کے آثار ہیں۔ یوپی کے زیادہ تر حصوں میں پیر کی صبح شدید کہرا چھائے رہنے کا امکان ہے۔
قومی راجدھانی کی بات کریں تو پورے دہلی این سی آر میں سرد لہر کا زبردست اثر دیکھا جا رہا ہے۔ پیر کو شدید بارش کی پیش گوئی کی گئی ہے جس سے سردی کا ایک اور دور شروع ہونے کا امکان ہے۔ اس دوران درجہ حرارت میں بھی زبردست گراوٹ آسکتی ہے۔
جموں کشمیر میں شدید ٹھنڈ کے درمیان اتوار کو دیر شام سری نگر سمیت وادی کے کئی حصوں میں برفباری کا سلسلہ شروع ہو گیا۔ جموں میں گھنے بادل چھائے رہے اور پھر آواز کے ساتھ دیر رات سے بارش شروع ہو گئی۔ اس سے ٹھنڈ میں مزید اضافہ ہو گیا ہے۔ شدید بارش اور برفباری کے امکان کے پیش نظر محکمہ موسمیات کی صلاح اور سیاحتی مقامات کی طرف جانے والی سڑکوں پر سفر میں مشکل حالات کو دیکھتے ہوئے بڑگام ضلع کی پولیس نے دودھ پتھری اور یوس مرگ جانے والے لوگوں اور سیاحوں کے لیے وارننگ جاری کی ہے.
ہریانہ کے سرسا، ہسار، فتح آباد، بھیوانی، جیند، امبالہ اور کرنال ضلعوں میں بھی سردی کے لیے الرٹ جاری کیا گیا ہے۔ پنجاب کے بھٹنڈا، برنالا، مکتسر موگا اور چنڈی گڑھ سمیت کئی ضلعوں میں گھنا کہرا اور سرد لہر کے لیے محکمہ موسمیات کے ذریعہ باخبرکیا گیا ہے۔