نئی دہلی :آنجہانی پنجابی گلوکار سدھو موسی والا کی والدہ چرن کور نے 58 سال کی عمر میں بیٹے کو جنم دیا ہے۔ ان کے والد بلکور سدھو نے سوشل میڈیا کے ذریعے یہ اطلاع دی ہے۔واضح رہے کہ اپنے والدین کے اکلوتے بیٹے پنجابی گلوکار سدھو موسے والا کو 29 مئی 2022 کو بے دردی سے قتل کر دیا گیا تھا۔ انہیں دن دہاڑے گولی مار دی گئی تھی اور موقع پر ہی ان کی موت ہو گئی تھی۔ رپورٹ کے مطابق گلوکارہ کی موت کے پیچھے گینگسٹر لارنس بشنوئی اور گولڈی برار گینگ کا ہاتھ تھا۔ سدھو موسے والا پنجابی میوزک انڈسٹری کے مقبول گلوکار تھے۔ گلوکار کی موت پر ان کے اہل خانہ کے ساتھ ساتھ ان کے مداحوں کو بھی گہرا صدمہ پہنچا تھا۔
آج سدھو موسے والا کے والد لکور سدھو نے اپنے انسٹاگرام پر اپنے نوزائیدہ بچے کے ساتھ تصویر پوسٹ کی ہے۔ اس تصویر میں وہ اپنے بیٹے کو گود میں لیے نظر آ رہے ہیں۔ اس کے ساتھ ہی آنجہانی گلوکار سدھو موسے والا کی ایک تصویر بھی ان کے پہلو میں رکھی ہے جس پر لکھا ہے ’لیجنڈ کبھی نہیں مرتے‘۔ اس تصویر کے ساتھ یلکور سدھو نے پنجابی میں کیپشن لکھا ہے ’’شبھدیپ کے کروڑوں مداحوں کی دعاؤں سے اوپر والے نے ہمیں شبھ کا چھوٹا بھائی دیا ہے۔ واہے گرو کی مہربانی سے ہمارا خاندان صحت مند ہے اور ان تمام لوگوں کا شکر گزار ہے جو ہم سے بہت پیار کرتے ہیں۔
بیٹے کی پیدائش سے قبل ہی سدھو موسے والا کی والدہ کے بارے میں خبریں گشت کر رہی تھیں کہ انہوں نے جڑواں بچوں کو جنم دیا ہے لیکن سدھو موسے والا کے والد بلکور سنگھ نے ایک پوسٹ شیئر کے ذریعے ان افواہوں کی تردید کر دی تھی۔ بلکور سدھو نے فیس بک پر لکھا تھا کہ ’’ہم سدھو کے مداحوں کے شکر گزار ہیں جو ہمارے خاندان کے بارے میں بہت فکر مند ہیں۔ میرے خاندان کے بارے میں بہت قیاس آرائیاں کی جا رہی ہیں۔ میری آپ سے گزارش ہے کہ ان تمام افواہوں پر یقین نہ کریں۔ جو بھی خبر ہوگی ہم آپ کے ساتھ شیئر کریں گے۔‘‘ یہاں یہ بھی واضح رہے کہ رپورٹس کے مطابق چرن کور کے یہاں اس بچے کی پیدا ئش آئی وی ایف کے ذریعے ہوئی ہے۔
