ثانیہ مرزا حج کی ادائیگی کیلئے سعودی عرب روانہ ہوگئیں

حیدرآباد: ہندوستان کی سابق معروف ٹینس اسٹار ثانیہ مرزا حج کی ادائیگی کیلئے سعودی عرب روانہ ہوگئیں۔ ثانیہ مرزا نے سوشل میڈیا کے ذریعے بتایا کہ وہ حج پر جارہی ہیں اور ایک بہتر انسان کے طورپر واپس آنے کی امید رکھتی ہیں۔ثانیہ مرزا نے اپنی روانگی کے حوالہ سے فی الحال کچھ نہیں بتایاہے۔ سوشل میڈیا پر لکھے گئے پیغام میں ثانیہ مرزا نے تمام لوگوں سے عاجزی کے ساتھ اپنی کسی بھی غلطی اور کوتاہی کیلئے معافی طلب کی ہے۔
انہوں نے لکھاہے کہ امید کرتی ہوں کہ اللّٰہ تعالیٰ میری دعائیں قبول کریں گے اور مجھے اچھے اور سیدھے راستے پر چلائیں گے۔ثانیہ مرزا نے اپنی پوسٹ میں یہ بھی لکھاہے کہ میں بہت خوش قسمت اور بے حد مشکور ہوں کہ مجھے یہ موقع حاصل ہوا ہے۔براہِ کرم مجھے اپنی دعاؤں میں یاد رکھئے۔ انہوں نے کہاکہ مجھے امید ہے کہ میں مضبوط ایمان اور ایک بہتر انسان کے طورپر واپس آؤں گی۔