فون ہیکنگ پر مہوا موئترا کا لوک سبھا اسپیکر کے نام مکتوب

نئی دہلی: ترنمول کانگریس کی رکن پارلیمان مہوا موئترا نے الزام لگایا کہ مرکزی حکومت ان کے فون اور ای میل کو ہیک کرنے کی کوشش کر رہی ہے۔ انہوں نے ایپل کے ذریعے بھیجے گئے الرٹ پیغام کے اسکرین شاٹس کی تصاویر سوشل میڈیا پلیٹ فارم ایکس پر شیئر کیں۔ اس میں انہوں نے دعویٰ کیا کہ ان کے علاوہ کئی دیگر اپوزیشن لیڈروں کو بھی نشانہ بنانے کی کوشش کی گئی ہے۔ٹی ایم سی کی ایم پی نے کہا کہ جس طرح سے وارننگ موصول ہو رہی ہے، یہ پہلی بار ہوا ہے۔ کئی اپوزیشن لیڈروں اور ارکان پارلیمنٹ کو اس طرح کے پیغامات موصول ہوئے ہیں۔انہوں نے کہا کہ حکومت جاسوسی کرنے کی کوشش کر رہی ہے۔ مرکزی حکومت کو اس پر جواب دینا چاہیے۔ ٹی ایم سی رکن پارلیمنٹ نے الزام لگایا کہ مرکزی حکومت اس طرح کا کام کر رہی ہے۔ یہ بالکل پیگاسس کی طرح ہے۔ اطلاعات و نشریات کی وزارت مرکزی حکومت کی ہدایات پر کام کر رہی ہے۔مہوا نے اپنی پوسٹ میں لکھا کہ مجھے ایپل کی جانب سے میسج اور میل کے ذریعے وارننگ ملی ہے کہ حکومت میرا فون اور ای میل ہیک کرنے کی کوشش کر رہی ہے۔ آپ کا خوف دیکھ کر مجھے آپ پر ترس آتا ہے۔
ٹی ایم سی کی ایم پی کو موصول ہونے والے پیغام میں لکھا گیا ہے ’الرٹ: ریاست اسپانسرڈ اٹیکرز آپ کے آئی فون کو نشانہ بنا رہے ہیں‘۔مہوا نے مزید کہا کہ شیوسینا کی رکن پارلیمنٹ پرینکا چترویدی اور انڈیا اتحاد کے دیگر قائدین کو بھی وارننگ ملی ہے۔ مہوا نے بتایا کہ وہ فون ہیکنگ کی اس کوشش کو لے کر لوک سبھا اسپیکر اوم برلا کو خط لکھ رہی ہیں۔انہوں نے انسٹاگرام پر لکھا کہ میں باضابطہ طور پر لوک سبھا اسپیکر اوم برلا کو لکھ رہی ہوں کہ وہ اپوزیشن ارکان پارلیمنٹ کی حفاظت کریں۔ ان سے راج دھرم کی پیروی کرنے کی درخواست کی جا رہی ہے۔وہ وزارت داخلہ کے حکام کو فوری طور پر طلب کریں، کیونکہ ہمارے فون/ای میل کو ہیک کرنے کی کوشش کی گئی ہے۔ مراعات کمیٹی کو بھی اس کا جائزہ لینا چاہیے۔