پٹنہ : لالو پرساد یادو نے راشٹریہ جنتادل کے قومی صدر کے لیے پیر کو پرچہ نامزدگی داخل کر دیا۔ انہوں نے ریاستی آر جے ڈی دفتر میں نامزدگی کا پرچہ بھرا۔ اس موقع پر بہار کے سابق نائب وزیر اعلیٰ اور حزب مخالف کے رہنما تیجسوی یادو بھی موجود تھے۔ کل پرچہ نامزدگی کی جانچ ہوگی۔ اس مرتبہ بھی لالو پرساد کا بلا مقابلہ پارٹی صدر بننا طے ہے۔ حالانکہ انتخاب اور نتیجے کا اعلان 5 جولائی کو کیا جائے گا لیکن آر جے ڈی کے سینئر رہنماؤں نے کھل کر کہا ہے کہ کارکنوں کی مانگ ہے کہ لالو پرساد ہی پارٹی کے قومی صدر بنے رہیں۔
آر جے ڈی کے تنظیمی اجلاس 28-2025 کے لیے یہ نامزدگی کی گئی ہے۔ آر جے ڈی کے قومی صدر کے طور پر نامزدگی داخل کرنے کے دوران لالو پرساد کے ساتھ کئی آر جے ڈی رہنما موجود تھے۔ 28 سال سے مسلسل لالو پرساد اس عہدہ پر برقرار ہیں۔پٹنہ میں لالو پرساد نے 13ویں مرتبہ آر جے ڈی کے قومی صدر کے لیے انتخابی افسر رام چندر پوربے کے سامنے ریاستی دفتر میں پرچہ نامزدگی داخل کیا۔ اس موقع پر تیجسوی یادو کے علاوہ سابق وزیر اعلیٰ رابڑی دیوی، رکن پارلیمنٹ میسا بھارتی، سابق وزرا پریم کمار گپتا، جئے پرکاش نارائن یادو سمیت کئی اراکین پارلیمنٹ اور اراکین اسمبلی موجود تھے۔ ابھی تک کسی نے لالو پرساد کے خلاف صدر عہدہ کے لیے نامزدگی داخل نہیں کی ہے۔
اس موقع پر تیجسوی یادو نے کہا کہ لالو پرساد یادو جی نے قومی صدر کے لیے پرچہ بھرا ہے۔ سبھی لوگوں میں اس کے لیے خوشی کی لہر دوڑ گئی ہے۔ پارٹی کے سبھی رہنما، کارکنان، سبھی لوگ خوش ہیں۔ وہ 12 مرتبہ اس عہدہ پر رہ چکے ہیں۔ اب 13ویں مرتبہ وہ اس عہدہ کو سنبھالیں گے۔ آنے والے وقت میں ہم لوگوں کو لالو جی سے بہت کچھ سیکھنے کو ملے گا۔
