دہلی-این سی آر سمیت شمالی ہندوستان کی کئی ریاستوں میں بدھ یعنی کل کی رات اچانک موسم بدل گیا۔ تیز بارش اور طوفان سے نظام زندگی متاثر ہوئی۔ کئی علاقوں میں بجلی کی سپلائی منقطع ہوگئی، ٹریفک میں خلل پڑا اور کئی مقامات پر طویل جام ہوگیا۔ طوفان کے باعث درخت، ہورڈنگز اور بورڈ گرنے کی اطلاعات ہیں۔ دہلی کے صفدرجنگ میں 79 کلومیٹر فی گھنٹہ کی رفتار سے ہوائیں چلیں۔ غازی آباد میں تیز آندھی کے بعد بارش ہوئی۔ جبکہ کئی علاقوں میں ژالہ باری بھی ہوئی۔ باغپت میں بھی تیز آندھی اور بارش کے ساتھ اولے گرے۔ اسی دوران چنڈی گڑھ میں طوفان کی وجہ سے سیکٹر 22 میں کئی درخت گر گئے۔
اسی دوران ایک درخت بھی سڑک پر گر گیا، انتظامیہ راحت اور بچاؤ کے کاموں میں مصروف رہی۔ مشرقی دہلی کے یمنا وہار، بھجن پورہ اور گوکل پوری جیسے علاقوں کو دھول کے طوفان نے متاثر کیا۔ اچانک طوفان کی وجہ سے حد نگاہ کم ہوگئی۔ نوئیڈا، گریٹر نوئیڈا اور غازی آباد میں بھی تیز آندھی کی زد میں، کئی جگہوں سے درخت گرنے کی اطلاعات ہیں، جس سے ٹریفک متاثر ہوا اور بجلی کی فراہمی میں بھی خلل پڑا۔
دہلی میں طوفان کی وجہ سے درجہ حرارت 14 ڈگری سیلسیس گر گیا ہے۔ محکمہ موسمیات کے مطابق درجہ حرارت 37 ڈگری سینٹی گریڈ سے گر کر 23 ڈگری سینٹی گریڈ تک پہنچ گیا۔ تیز ہواؤں کے ساتھ موسلا دھار بارش نے پورے دہلی-این سی آر خطہ کو متاثر کیا۔ پالم میں 72 کلومیٹر فی گھنٹہ کی رفتار سے چلنے والی تیز ہواؤں کے باعث کئی علاقوں میں درخت گر گئے اور بجلی کی فراہمی بھی متاثر ہوئی۔ اندرا گاندھی بین الاقوامی ہوائی اڈے (ٹرمینل -3) پر مٹی کا طوفان آیا۔ اس کے بعد موسلا دھار بارش بھی ہوئی۔
لونی دیہات، ہنڈن ایئرفورس اسٹیشن، غازی آباد، اندرا پورم، چھپرولا، نوئیڈا، دادری، گریٹر نوئیڈا، فرید آباد کے ساتھ ساتھ سہارنپور، دیوبند، نجیب آباد، مظفر نگر، بجنور، کھٹولی، ساکوٹی ٹانڈہ، ہستینا پور، مودی نگر ، کیندرا پور، کیتھر پور میں بارش ہوسکتی ہے۔ گڑھ مکتیشور، پلکھوا، ہاپوڑ، گلاوٹی، سیانا، سکندرآباد اور بلند شہر میں 30 سے 50 کلومیٹر فی گھنٹہ کی رفتار سے ہوائیں چلیں ۔
اتراکھنڈ میں بھی موسم بدل گیا۔ ہندوستانی محکمہ موسمیات (آئی ایم ڈی) کی جانب سے جاری کردہ ایلرٹ کے بعد کئی اضلاع میں شدید بارشیں ریکارڈ کی گئیں۔ اس کی وجہ سے یمونوتری اور برکوٹ (اترکاشی) کے ساتھ ساتھ بیرونکھل (ضلع پوڑی) کے کئی علاقوں میں شدید بارش ہوئی ہے۔ یمنوتری اور برکوٹ علاقوں میں شدید بارش کی وجہ سے ندیوں اور ندی نالوں میں پانی کی سطح بڑھ گئی اور کئی مقامات پر سڑکیں بند ہوگئیں۔ پوڑی ضلع کے بیرونکھل علاقے میں موسلادھار بارش نے دیہی علاقوں میں ٹریفک کو بھی متاثر کیا۔
