خواجہ غریب نوازؒ کی بارگاہ میں گوتم اڈانی کی حاضری

اجمیر:ملک کے مشہور صنعتکار گوتم اڈانی ہفتہ کو اپنی اہلیہ کے ساتھ سلطان الہند خواجہ معین الدین چشتی ؒکی بارگاہ اجمیر پہنچے اور خواجہ غریب نواز ؒکے مزار پر جبین نیاز خم کی۔ چادر اور عقیدت کے پھول چڑھاکر ملک کی خوشحالی اور ترقی کیلئے دعائیں کیں۔ اس دوران درگاہ کے خادم سلمان چشتی نے انہیں تبرک بھی پیش کیا۔خبر کے مطابق گوتم اڈانی پرائیویٹ طیارے سے کشن گڑھ ایئرپورٹ پہنچے جہاں سے وہ سڑک کے ذریعے اجمیر درگاہ پہنچے۔شام کو درگاہ پہنچنے کے بعد انہوں نے خواجہ غریب نواز معین الدین حسن چشتیؒ کے مزار پر حاضری دی اور چادر چڑھائی۔گوتم اڈانی نے درگاہ کے بیگم دلان میں بیٹھ کر قوالی کا بھی لطف لیا۔درگاہ شریف آنے والے زائرین اکثر یہاں بیٹھ کر قوالی سے لطف اندوز ہوتے ہیں۔ درگاہ کے خادم سلمان چشتی نے خواجہ صاحب کی تعلیمات اور صوفی روایت کی اہمیت سے اڈانی کو واقف کروایا۔درگاہ پر حاضری کے بعد گوتم اڈانی کا اجمیر کے مہاویر سرکل علاقے میں شادی کی تقریب میں شرکت کا پروگرام تھا۔