چھتیس گڑھ کے بیجا پور ضلع میں سلامتی دستوں اور نکسلیوں کے درمیان زبردست تصادم کی خبر سامنے آئی ہے۔ اس تصادم میں 22 نکسلی ڈھیر کر دیئے گئے ہیں۔ وہیں ڈی آر جی کا ایک جوان شہید ہوا ہے۔ ایک سینئر پولیس افسر نے یہ اطلاع دی۔ پولیس افسر نے بتایا کہ تصادم بیجا پور اور دنتے واڑہ ضلعوں کی سرحد پر واقع جنگل میں اس وقت شروع ہوا جب سلامتی دستوں کی ایک مشترکہ ٹیم گنگالور تھانہ علاقہ (بیجا پور) میں نکسل مخالف مہم پر نکلی تھی۔
اس تصادم کی تصدیق ضلع کے ایس پی جتندر یادو نے بھی کی ہے۔ انہوں نے بتایا کہ دونوں طرف سے رک رک کرگولی باری کا دور جاری ہے۔ علاقے میں سرچنگ آپریشن تیز کر دی گئی ہے۔ پولیس نے بتایا کہ تفصیلی جانکاری کا انتظار ہے۔ ذرائع کے مطابق تصادم میں اب تک 22 نکسلیوں کی موت ہو گئی ہے۔ اس دوران دو نکسلیوں کے ساتھ ساتھ اسلحہ اور بڑی تعداد میں گولہ بارود بھی برآمد کیا گیا ہے۔
اس سے پہلے بیجا پور اور نارائن پور سے لگی مہاراشٹر کی سرحد پر سیکوریٹی فورسز اور نکسلیوں کے درمیان تصادم ہوا تھا۔ اس میں 31 نکسلیوں کی موت ہو گئی تھی۔ اطلاع کے مطابق مارے گئے نکسلیوں کی تعداد بڑھ سکتی ہے۔ ساتھ ہی تصادم کی جگہ سے آٹومیٹک اسلحہ بھی برآمد کیے گئے ہیں۔
واضح رہے کہ چھتیس گڑھ میں سلامتی دستے مسلسل نکسلیوں کے خلاف ایکشن لے رہے ہیں۔ بیجاپور کے فرسےگڑھ تھانہ نیشنل پارک علاقے میں مہاراشٹر اور چھتیس گڑھ کی سرحد پر صبح سے تصادم جاری ہے وہیں اس تصادم میں دو جوان زخمی ہوئے ہیں۔
