’شرادھ‘ کا کھانا بنانے کے لیے استعمال کیے گئے سلنڈر میں دھماکہ

پٹنہ بہار کی راجدھانی پٹنہ میں آج اس وقت خوفناک حادثہ پیش آیا جب ایک گھر میں ’شرادھ‘ کا کھانا بنانے کے لیے استعمال کیے گئے سلنڈر میں دھماکہ ہو گیا۔ شرادھ کی وجہ سے گھر کے لوگوں کی آمد و رفت کا سلسلہ جاری تھا، کہ اچانک سلنڈر میں آگ لگ گئی اور اس میں دھماکہ ہو گیا۔ اس حادثہ میں تقریباً 50 افراد جھلس گئے ہیں، جن میں سے کئی لوگوں کی حالت سنگین بتائی جا رہی ہے۔ حادثہ پٹنہ ضلع کے مسوڑھی تھانہ کے تحت واقع چپور گاؤں کا ہے۔مقامی لوگوں کا کہنا ہے کہ سَنت پاسوان کے گھر میں شرادھ کا عمل تقریباً ختم ہو چکا تھا۔ آج صبح سَنت پاسوان کی بیٹی خوشبو (12 سال) چھوٹے سلنڈر پر کھانا بنا رہی تھی، تبھی اچانک گیس سلنڈر میں رساؤ ہوا اور دیکھتے ہی دیکھتے سلنڈر میں آگ لگ گئی۔ اس آگ سے افرا تفری کا ماحول پیدا ہو گیا اور اس سے پہلے کہ کوئی کچھ کرتا، سلنڈر میں دھماکہ ہو گیا۔