پٹنہ:بہار کی راجدھانی پٹنہ میں اس وقت ہنگامہ کا ماحول پیدا ہو گیا جب فوج میں بھرتی کے لیے امیدواروں کا فزیکل ٹیسٹ ہو رہا تھا۔ ہنگامہ اس لیے پیدا ہو گیا کیونکہ داناپور میں بھرتی کے لیے صلاحیت سے 10 گنا زیادہ امیدوار پہنچ گئے تھے۔ نتیجہ یہ ہوا کہ اس بڑی تعداد میں پہنچے امیدواروں کو قابو میں کرنا پولیس کے لیے مشکل ہو گیا ہے۔
دراصل داناپور آرمی سنٹر میں 38 اضلاع کی آرمی بحالی چل رہی ہے۔ اسی تعلق سے بڑی تعداد میں امیدوار داناپور پہنچ گئے اور امیدواروں سے پورا کریپّا گراؤنڈ بھر گیا۔ بھرتی کے لیے فزیکل ٹیسٹ دینے کے مقصد سے جمع امیدواروں کی بھیڑ اتنی زیادہ تھی کہ سینک چوک، کمپنی باغ، سائیں مندر اور بس اسٹینڈ پورا کا پورا بھر گیا تھا۔ اس دوران روڈ پر امیدوار یہاں وہاں بیٹھے ہوئے بھی نظر آئے۔ آرمی گراؤنڈ میں امیدواروں کا فزیکل ٹیسٹ لینے کا عمل شروع ہوا۔ فزیکل ٹیسٹ لینے کے لیے آرمی کے رانچی ہیڈکوارٹر اور جنوبی ہند ہیڈکوارٹر سے افسران پہنچے تھے۔ اسی دوران دوڑ میں جو نوجوان چھوٹ گئے، انھوں نے ہنگامہ شروع کر دیا۔
میڈیا رپورٹس کے مطابق بھرتی میں ہنگامہ کو دیکھتے ہوئے پولیس نے نوجوانوں کو کھدیڑنا شروع کر دیا اور لاٹھی بھی چلائی۔ جواب میں نوجوانوں نے پولیس پر پتھراؤ شروع کر دیا۔ حالانکہ موقع پر پہنچے سٹی ایس پی مغرب نے لاٹھی چارج سے انکار کرتے ہوئے حالات کو قابو میں بتایا ہے۔ لیکن یہ تو ظاہر ہے کہ بڑھتی بے روزگاری کی وجہ سے بڑی تعداد میں نوجوان فوج میں بھرتی کے مقصد سے ٹیسٹ دینے پہنچ گئے، اور پھر انھیں سنبھالنا انتظامیہ کے لیے مشکل ہو گیا۔
