مونگیر میں مفصل تھانہ علاقہ کے کلیان چک گاؤں میں 3 دنوں سے لاپتہ طالبہ کی لاش منگل (7 جولائی) کے روز گھر کے قریب کنویں سے برآمد ہوئی۔ 20 سالہ طالبہ سندھیا کماری نیٹ پیپر لیک کی وجہ سے کافی پریشان تھی۔ اطلاع ملتے ہی مفصل تھانہ پولیس موقع پر پہنچی اور مقامی لوگوں کی مدد سے لاش کو کنویں سے باہر نکال کر پوسٹ مارٹم کے لیے بھیجنے کا عمل شروع کیا۔ طالبہ کے والد دھرم ویر یادو نے بتایا کہ سندھیا ان کی اکلوتی بیٹی تھی۔ سندھیا پڑھائی میں کافی اچھی تھی اور ڈاکٹر بننا چاہتی تھی۔ اسی لیے دو بار نیٹ کا امتحان دے چکی تھی۔
رشتہ داروں کا کہنا ہے کہ دونوں بار نیٹ کا پیپر لیک ہونے کی وجہ سے سندھیا پریشان رہنے لگی تھی۔ ان کا دعوی ہے کہ 5 جولائی کی صبح تقریبا 4 بجے وہ رفع حاجت کے لیے گھر سے نکلی تھی اور گھر واپس نہیں لوٹی۔ کافی تلاش کے بعد پولیس کو گمشدگی کی اطلاع دی گئی۔ منگل کے روز گھر کے قریب واقع ایک کنویں میں لاش نظر آنے کے بعد مقامی لوگوں نے پولیس کو خبر دی۔
مفصل تھانہ کے انچارج وپن کمار سنگھ نے بتایا کہ گمشدگی کی شکایت پہلے ہی درج کرائی جا چکی ہے۔ کنویں سے لاش نکال لی گئی ہے۔ رشتہ داروں نے پوچھ تاچھ کے دوران بتایا کہ طالبہ نے مبینہ طور پر خود ہی کنویں میں چھلانگ لگائی ہوگی۔ حالانکہ موت کی اصل وجہ کا پتہ پوسٹ مارٹم رپورٹ اور پولیس کی تفتیش کے بعد ہی لگ سکے گا۔ طالبہ کے والدین نیٹ امتحان کے بعد پیدا صورت حال کو ہی اس موت کا ذمہ دار ٹھہرا رہے ہیں، لیکن فوری طور پر کچھ بھی کہنا جلدبازی ہوگی۔ پولیس کا بھی یہی کہنا ہے کہ پہلے پوسٹ مارٹم رپورٹ آ جائے، پھر آگے کی کارروائی کی جائے گی۔
