جموں و کشمیر واقع درگاہ حضرت بل کے تمام افسران اور ملازمین معطل

سری نگر:جموں وکشمیر وقف بورڈ کی چیئرپرسن ڈاکٹر درخشاں اندرابی نے درگاہ حضرت بل میں تعینات تمام افسران اور ملازمین کو سنگین غفلت برتنے کی پادائش میں معطل کرنے کا حکم جاری کر دیاہے۔جموں وکشمیر وقف بورڈ کی جانب سےجاری حکم نامہ میں کہا گیا ہےکہ عید میلاد النبی (ص) کے روز وقف بورڈ چیئرپرسن ڈاکٹر درخشاں اندرابی نے درگاہ حضرت بل کا اچانک دورہ کیا تو وہاں پر موجود عقیدتمندوں نے چیئرپرسن کو وقف ملازمین کی غفلت کے بارے میں آگاہ کیا۔لوگوں نے بتایا کہ درگاہ حضرت بل میں تعینات وقف افسران اور ملازمین عقیدتمندوں کو سہولیات فراہم کرنے میں ناکام ثابت ہوئے ہیں۔وقف بورڈ چیئرپرسن نے لوگوں کی شکایت کا سخت نوٹس لیتے ہوئے درگاہ حضرت بل میں تعینات وقف بورڈ کے سبھی افسران اور ملازمین کو فوری طورپر معطل کرنے کے احکامات صادر کئے۔حکم نامہ میں لکھا گیا کہ سنگین غفلت برتنے کی پادائش میں وقف ملازمین کو معطل کیا گیا ہے۔ وقف چیئرپرسن ڈاکٹر درخشاں اندرابی کی قیادت میں اعلیٰ سطحی کمیٹی بھی تشکیل دی گئی ہے تاکہ متعلقین کے خلاف قانون کے مطابق کارروائی کی جا سکے ۔