مہاراشٹر کے سینئر لیڈر ملند دیوڑا کاکانگریس سے استعفیٰ

ممبئی : مہاراشٹر میں کانگریس کے سینئر لیڈر ملند دیوڑا نے پارٹی سے استعفیٰ دے دیا ہے۔ خبر ہے کہ ملند دیوڑا ایکناتھ شنڈے کیمپ میں شامل ہو سکتے ہیں۔دیوڑا نے خود اتوار کی صبح یہ جانکاری دی اور سوشل میڈیا پلیٹ فارم ایکس (سابقہ ٹویٹر) پر لکھا کہ آج میرے سیاسی سفر کا ایک اہم باب ختم ہو گیا ہے۔ میں نے کانگریس کی بنیادی رکنیت سے استعفیٰ دے دیا ہے۔ پارٹی سے میرے خاندان کا 55 سالہ رشتہ ختم ہوگیا ہے۔ میں سبھی رہنماؤں، ساتھیوں اور کارکنوں کا گزشتہ برسوں میں ان کی غیر متزلزل حمایت کے لئے شکر گزار ہوں۔ملند دیوڑا مہاراشٹر کے آنجہانی لیڈر اور سابق مرکزی وزیر مرلی دیوڑا کے بیٹے ہیں۔ ملند جنوبی ممبئی پارلیمانی سیٹ سے ممبر پارلیمنٹ رہ چکے ہیں۔ حالنکہ اس بار دیوڑا کا یہ اقدام ان قیاس آرائیوں کے درمیان آیا ہے کہ یہ سیٹ انڈیاکی اتحادی شیوسینا (اُدھو ٹھاکرے گروپ) کو دی جائے گی۔
ایسی قیاس آرائی ہے کہ وہ شیوسینا کے ایکناتھ شندے گروپ میں شامل ہو سکتے ہیں۔ حالانکہ ملند دیوڑا نے ان قیاس آرائیوں کو ‘افواہ’ قرار دیا تھا۔ تاہم دیوڑا نے ہفتہ کو صحافیوں سے بات کرتے ہوئے کہا تھا کوہ اپنے حامیوں کے ساتھ بات چیت کر رہے ہیں۔یہ پوچھے جانے پر کہ کیا وہ اپنے حامیوں کے ساتھ کوئی منصوبہ بنا رہے ہیں، انہوںنے کہا کہ میں اپنے حامیوں کی بات سن رہا ہوں… ابھی کوئی فیصلہ نہیں لیا ہے۔