مایا وتی کی جانب سے مرکزی حکومت کی ’پردھان منتری غریب کلیان اَن یوجنا‘ کی نکتہ چینی

لکھنؤ: بہوجن سماج پارٹی (بی ایس پی) کی سربراہ مایاوتی نے بدھ کو بابا صاحب ڈاکٹر بھیم راؤ امبیڈکر کو ان کی برسی کے موقع پر خراج عقیدت پیش کیا۔ اس موقع پر انہوں نے مرکزی حکومت کی ’پردھان منتری غریب کلیان انا یوجنا‘ پر نکتہ چینی کی۔امبیڈکر کو ان کے 67ویں ‘پرینیروان دیوس پر خراج عقیدت پیش کرتے ہوئے، بی ایس پی سپریمو مایاوتی نے سوشل میڈیا پلیٹ فارم ایکس پر لکھا، ’’تقریباً 140 کروڑ کی وسیع آبادی والے ہندوستان کے غریبوں، مزدوروں، دلتوں، آدیواسیوں، انتہائی پسماندگان سمیت نظرانداز کئے گئے ’بہوجنوں‘ کے مسیحا اور ملک کے انسان دوست اور مساوات پسند آئین کے خالق، بھارت رتن بابا صاحب ڈاکٹر بھیم راؤ امبیڈکر کو ان کے ‘پرینروان دیوسپر زبردست خراج عقیدت۔
انہوں نے مزید لکھا، ’’ملک کے 81 کروڑ سے زیادہ غریبوں کو کھانا کھلانے کے لیے سرکاری خوراک پر انحصار کرنے کی حالت نہ تو آزادی کا خواب تھا اور نہ ہی ان کے لیے فلاحی آئین بناتے وقت بابا صاحب ڈاکٹر بھیم راؤ امبیڈکر نے یہ سوچا تھا، یہ صورت حال انتہائی افسوس ناک ہے۔‘‘سابق وزیر اعلیٰ نے لکھا کہ ’’ملک میں روزی روٹی کی کمی اور مہنگائی کے حملے کی وجہ سے آمدنی اٹھنی بھی نہیں ہے لیکن خرچہ روپیہ ہونے کے سبب غریبوں، مزدوروں، چھوٹے تاجروں، کسانوں، متوسط اور تمام محنت کشوں کی حالت پریشان کن اور تشویشناک ہے۔