راجیہ سبھا رکن رجنی پاٹل کی بھی رکنیت بحال

نئی دہلی : کانگریس کے سابق صدر راہل گاندھی کی لوک سبھا رکنیت بحال ہونے کے بعد کانگریس کی راجیہ سبھا رکن جنی پاٹل کی رکنیت بھی بحال کر دی گئی ہے۔ ساتھ ہی رجنی پاٹل کو یہ اجازت بھی مل گئی ہے کہ وہ 7 اگست یعنی پیر کے روز سے ہی ایوان بالا کے اجلاس میں شریک ہو سکتی ہیں۔
واضح رہے کہ صدر جمہوریہ کے خطاب پر شکریہ کی تحریک کے دوران وزیر اعظم نریندر مودی کے ذریعہ جواب دیئے جانے کے دوران اپوزیشن اراکین کے احتجاج کی ویڈیو مبینہ طور پر سوشل میڈیا پر پوسٹ کرنے کے الزام میں رجنی پاٹل کو راجیہ سبھا سے معطل کر دیا گیا تھا۔ اس معطلی کے خلاف اپوزیشن پارٹیوں کے لیڈران نے آواز اٹھائی تھی، لیکن ان کی معطلی ختم کرنے کا حکم صادر نہیں ہوا تھا۔
آج صبح جب ایوان کی کارروائی شروع ہوئی تو قانون سازی کی کارروائی کو نمٹانے کے دوران ہی چیئرمین جگدیپ دھنکھڑ نے سروج پانڈے سے استحقاق کمیٹی کی 74ویں رپورٹ کو ایوان کی میز پر رکھنے کے لیے کہا۔ سروج پانڈے نے کہا کہ کمیٹی نے رجنی پاٹل کو مبینہ طور پر ایوان کی کارروائی کی ویڈیو بنانے اور اسے سوشل میڈیا پر پوسٹ کرنے کا قصوروار پایا ہے۔ تاہم کمیٹی کا ماننا ہے کہ اس کے حوالے سے معطل کی گئیں پاٹل کی سزا کو مکمل سزا تصور کیا جائے اوران کی رکنیت آج سے ہی بحال کی جائے۔
سروج پانڈے کے بیان کے بعد راجیہ سبھا چیئرمین جگدیپ دھنکھڑ نے رجنی پاٹل کی رکنیت بحال کرنے کی تجویز ایوان میں پیش کی جسے صوتی ووٹ سے منظوری مل گئی۔ اس کے بعد دھنکھڑ نے کہا کہ رجنی پاٹل آج سے ہی کارروائی میں حصہ لے سکتی ہیں۔