’نیشنل ٹیسٹنگ ایجنسی‘ (این ٹی اے) نے ’یوجی سی نیٹ‘ جون 2026 کے نتائج جاری کر دیے ہیں۔ امتحان میں شامل امیدوار اپنا اسکور کارڈ سرکاری ویب سائٹ پر دیکھ سکتے ہیں۔ اس مرتبہ یہ امتحان 87 مضامین کے لیے منعقد کیا گیا تھا، فی الحال 84 مضامین کے نتائج جاری کیے گئے ہیں۔ انگریزی، کامرس اور سماجیات کے امیدواروں کو نتیجے کے لیے انتظار کرنا ہوگا، کیونکہ ان تینوں مضامین کا امتحان دوبارہ منعقد کیا جانا ہے۔ این ٹی اے کے مطابق یو جی سی نیٹ جون 2026 کے 84 مضامین کے لیے کل 773806 امیدواروں نے رجسٹریشن کرایا تھا۔ ان میں 430195 خواتین، 343575 مرد اور 36 تھرڈ جینڈر امیدوار شامل تھے۔ ان میں سے 607151 امیدواروں نے امتحان دیا، جس کا انعقاد ملک بھر کے 286 شہروں میں 655 امتحانی مراکز پر کیا گیا تھا۔ امتحان 22، 23، 24، 25، 29 اور 30 جون کے ساتھ ساتھ 5 جولائی 2026 کو منعقد ہوا تھا۔
84 مضامین کے نتائج میں 4241 امیدواروں نے ’جے آر ایف‘ اور اسسٹنٹ پروفیسر کے لیے اہل قرار دیے گئے ہیں۔ یہ امتحان میں شامل کل امیدواروں کا 0.70 فیصد ہے۔ وہیں 45904 امیدوار اسسٹنٹ پروفیسر اور ’پی ایچ ڈی‘ میں داخلے کے لیے اہل ہیں۔ یہ تعداد امتحان میں شامل امیدواروں کا 7.56 فیصد ہے۔ اس کے علاوہ 97434 امیدواروں کو صرف ’پی ایچ ڈی‘ میں داخلے کے لیے اہل قرار دیا گیا ہے۔ ان کا تناسب 16.05 فیصد ہے۔ اس بار 3 مضامین کے امیدواروں کو نتیجے کے لیے کچھ اور انتظار کرنا پڑے گا۔ انگریزی، کامرس اور سماجیات کا امتحان دوبارہ منعقد کیا جائے گا۔ دراصل ان مضامین کے سوالیہ پرچوں میں مختلف قسم کی غلطیوں کی شکایات سامنے آئی تھیں۔ اس کے بعد این ٹی اے نے ان تینوں مضامین کا امتحان دوبارہ کرانے کا فیصلہ کیا۔ ان مضامین کے دوبارہ امتحانات ستمبر 2026 میں ہونے کی اطلاع دی گئی ہے۔
’این ٹی اے‘ نے نتائج جاری کرنے سے قبل 84 مضامین کی ’انسر کی‘، سوالیہ پرچے اور امیدواروں کے ریکارڈ کیے گئے جوابات سرکاری ویب سائٹ پر دستیاب کرائی تھی۔ امیدواروں کو 16 سے 18 اگست 2026 کے درمیان ’انسر کی‘ پر اعتراض درج کرنے کا موقع دیا گیا تھا۔ امیدواروں کی جانب سے موصول ہونے والے اعتراضات کی ماہرین نے جانچ کی، جس کے بعد حتمی ’انسر کی‘ جاری کی اور نتیجہ جاری کیا گیا۔ امیدوار اپنے نتائج سرکاری ویب سائٹ پر چیک کر سکتے ہیں: سب سے پہلے ’یو جی سی نیٹ‘ کی سرکاری ویب سائٹ ugcnet.nta.nic.in پر جائیں۔ ہوم پیج پر ’یوجی سی نیٹ جون 2026‘ ریسلٹ/اسکور کارڈ کے لنک پر کلک کریں۔ مطلوبہ تفصیلات لاگ ان میں درج کریں۔ سبمٹ کرنے کے بعد آپ کا اسکور کارڈ اسکرین پر ظاہر ہو جائے گا۔ نتائج ڈاؤن لوڈ کر لیں۔ اس کا پرنٹ آؤٹ یا ڈٰجیٹل کاپی محفوظ رکھ سکتے ہیں۔
