ناسک: نیشنلسٹ کانگریس پارٹی سے علیحدہ ہونے والے لیڈر نائب وزیر اعلی اجیت پوار ممبئی میں اپنے چچا اور این سی پی صدر شرد پوار کی رہائش گاہ پہنچے۔ گھر سے نکلنے کے بعد انہوں نے کہا کہ خاندان سب سے پہلے آتا ہے۔ اجیت پوار جمعہ کی دیر رات سلور اوکس میں شرد پوار کے گھر پہنچے اور چچی پرتیبھا پوار کی عیادت کی۔ حال ہی میں پرتیبھا پوار کے ہاتھ کی ایک نجی اسپتال میں سرجری ہوئی ہے۔
اجیت پوار نے ہفتہ کو کہا ’’سیاست الگ ہے، خاندان ہمیشہ پہلے آتا ہے۔ میں نے اپنے ضمیر کی پیروی کی اور اپنی چچی کی خیریت دریافت کرنے چلا گیا۔‘‘ این سی پی سے علیحدگی اور شیوسینا- بھارتیہ جنتا پارٹی کی حکومت میں دوسرے نائب وزیر اعلی کے طور پر شامل ہونے کے 15 دن بعد شرد پوار کے ساتھ یہ ان کی پہلی ملاقات تھی، جس سے سیاسی حلقوں میں کافی دلچسپی پیدا ہوئی۔
انہوں نے کہا کہ انہوں نے اپنے چچا اور چچازاد بہن، بارامتی سے ایم پی سپریا سولے سے انتہائی خوشگوار ماحول میں ملاقات کی, لیکن اس کی تفصیل نہیں بتائی۔ تمام سیاسی افواہوں کو مسترد کرتے ہوئے وزیر اعلیٰ ایکناتھ شندے نے جمعہ کو دیر گئے کہا کہ اجیت پوار اپنے خاندان سے ملنے گئے ہیں۔
خیال رہے کہ پرتیبھا پوار سرجری ہونے کے بعد ان کی حالت ‘مستحکم’ ہے۔ انہیں پارٹی کے رہنماؤں اور کارکنوں کی طرف سے پیار سے ‘کاکی’ (چچی) کہا جاتا ہے اور وہ آنجہانی ہندوستانی ٹیسٹ کرکٹر سداشیو شندے کی بیٹی ہیں۔ شرد پوار اور ان کی شادی 1967 میں ہوئی تھی۔
