دربھنگہ میں مجوزہ آل انڈیا انسٹی ٹیوٹ آف میڈیکل سائنسز (ایمس) کے تعمیری کام کے حوالے سے کانگریس نے مرکزی حکومت کو نشانہ بنایا ہے۔ کانگریس نے دعویٰ کیا ہے کہ 10 سال بعد بھی دربھنگہ ایمس کے نام پرصرف مین گیٹ کا ستون ہی تیار ہو پایا ہے۔ اس معاملے پر کانگریس کے ترجمان اسیت ناتھ تیواری نے مرکزی حکومت اور پی ایم مودی پر حملہ بولا ہے۔
کانگریس پارٹی نے دربھنگہ ایمس کے مین گیٹ کے ستون کی تصویر سوشل میڈیا پر شیئر کی ہے۔ اس کے ساتھ ہی پارٹی نے الزام لگایا ہے کہ 10 سال بعد بھی دربھنگہ ایمس کے نام پر الاٹ زمین پر صرف مین گیٹ ہی بن پایا ہے جبکہ حکومت نے دعویٰ کیا تھا کہ یہاں علاج شروع ہو چکا ہے۔ کانگریس پارٹی نے ان دعوؤں کو مکمل طور پر غلط قرار دیا ہے۔
کانگریس کے ترجمان اسیت ناتھ تیواری نے مرکزی حکومت اور پی ایم مودی کو نشانہ بنا تے ہوئے کہا کہ وزیر اعظم مسلسل جھوٹ بولتے رہے ہیں اور دربھنگہ ایمس اس کی سب سے بڑی مثال ہے۔ اسیت ناتھ تیواری نے کہا کہ پی ایم مودی نے کئی پلیٹ فارمز سے کہا ہے کہ دربھنگہ ایمس میں علاج ہو رہا ہے لیکن حقیقت یہ ہے کہ وہاں صرف ایک گیٹ کھڑا ہے۔ آج کانگریس نے عوام کے سامنے سچائی رکھ دی ہے۔
تیواری نے مرکزی حکومت پر الزام لگایا کہ وہ متھیلا کے لوگوں کو محض جموں سے گمراہ کر رہی ہے۔ انہوں نے مرکزی حکومت پر صحت جیسی بنیادی ضرورت پر بھی سیاست کرنے کا الزام لگایا۔ ’آج تک‘ کی رپورٹ کے مطابق مقامی باشندے بھی دربھنگہ ایمس پر ناراضگی ظاہر کر رہے ہیں۔ دربھنگہ کے رہائشی اویناش بھاردواج نے کہا کہ پورے 10 سال میں صرف ایمس کا گیٹ بن پایا ہے۔ دربھنگہ میں بی جے پی کے ہی ایم پی اور ایم ایل اے ہیں، پھر بھی کام آگے نہیں بڑھ رہا ہے۔ ایسا لگتا ہے کہ ایمس کو بننے میں ابھی 10 سال اور لگ جائیں گے۔
متھلا اسٹوڈنٹ یونین کے رہنما گوپال چودھری نے حکومت پر لوگوں کی صحت کا مذاق اڑانے کا الزام لگایا۔ انہوں نے کہا کہ 10 سال بعد سچائی یہ ہے کہ دربھنگہ ایمس کا صرف گیٹ ہی تیارہوا ہے۔ حکومت جان بوجھ کر ایمس میں تاخیر کرنا چاہتی ہے۔ متھیلا کے لوگوں کی صحت کا مذاق اڑایا جا رہا ہے۔ گوپال چودھری نے انتباہ دیا کہ اگر ایمس کا تعمیراتی کام جلد شروع نہیں ہوا تو طلباء اور نوجوان احتجاج کرنے پر مجبور ہوں گے۔
واضح رہے کہ بہار میں پٹنہ کے بعد دوسرا ایمس دربھنگہ میں بنایا جارہا ہے۔ مرکزی حکومت نے فروری 2015 میں دربھنگہ میں ایمس بنانے کا اعلان کیا تھا۔ اس کے بعد 2020 میں یہ تجویز منظور کی گئی اور 13 نومبر 2024 کو وزیر اعظم نریندر مودی نے اسپتال کی تعمیر کا سنگ بنیاد رکھا تھا۔ دربھنگہ میں ایمس 187 ایکڑ اراضی پر تعمیر کیا جا رہا ہے۔ اس پر 1,264 کروڑ روپے کی لاگت آنے کا اندازہ ہے۔
