کانگریس کی بہار یونٹ نے ریاست کی این ڈی اے حکومت پر الزام عائد کیا ہے کہ اس نے بی جے پی کے اشارے پر انتخابی چندہ کے لالچ میں 1200 ایکڑ قابل زراعت اراضی اڈانی پاور کو محض ایک روپے سالانہ کرایہ پر 33 سالوں کے لیے سونپ دی۔ میڈیا ڈپارٹمنٹ کے چیئرمین اور ترجمان راجیش راٹھوڑ نے کانگریس کے ریاستی ہیڈکوارٹر صداقت آشرم میں جمعہ کے روز پریس کانفرنس سے خطاب کرتے ہوئے کہا کہ ریاست میں سرکاری بجلی کمپنیاں موجود ہونے کے باوجود اڈانی پاور کو اراضی الاٹ کرنا حکومت کی نیت پر سوال کھڑے کرتا ہے۔
پریس کانفرنس کے دوران راجیش راٹھوڑ نے الزام عائد کیا کہ اڈانی پاور کے لیے تقریباً 10 لاکھ آم اور لیچی جیسے درختوں کی قربانی دی جا رہی ہے، جبکہ اس پروجیکٹ سے ملک میں سب سے مہنگی شرح 6.75 روپے فی یونٹ بجلی ملنے والی ہے۔ راجیش کا کہنا ہے کہ بی جے پی ’ایک درخت ماں کے نام‘ کا نعرہ دے کر لوگوں کو گمراہ کر رہی ہے اور وہیں دوسری طرف کسانوں کو ان کی زمین کا مناسب معاوضہ دیے بغیر خوفزدہ کر زمین حاصل کر رہی ہے۔
کانگریس ترجمان نے دعویٰ کیا کہ 2013 میں یو پی اے حکومت کے ذریعہ بنائے گئے حصول اراضی قانون کے تحت کسانوں کو ’سرکل ریٹ‘ سے 4 گنا معاوضہ ملنا چاہیے۔ انھوں نے مزید کہا کہ اصول کے مطابق 5 سالوں تک زمین کا استعمال نہیں ہونے پر اسے واپس کرنا لازمی بھی ہے۔ ساتھ ہی انھوں نے الزام عائد کیا کہ نتیش کمار اور بی جے پی نے انتخاب سے قبل اڈانی پاور کو فائدہ پہنچانے کے لیے یہ فیصلہ لیا ہے۔ کانگریس نے اس معاملے کی اعلیٰ سطحی جانچ کا مطالبہ کیا اور ساتھ ہی یہ بھی کہا کہ متاثرہ کسانوں کو مناسب معاوضہ دینے کے علاوہ پاور پلانٹ میں ترجیحی طور پر مقامی نوجوانوں کو روزگار فراہم کیا جانا چاہیے۔
