پٹنہ : بہار میں گزشتہ کچھ دنوں سے ہو رہی بارش نے جہاں کسانوں کے چہرے پر خوشیاں لا دی ہیں، وہیں ’آسمانی آفت‘ یعنی بجلی گرنے کی وجہ سے کئی گھر سہارے سے محروم ہو گئے ہیں۔ بہار کے الگ الگ اضلاع میں منگل کے روز آسمانی بجلی کی زد میں آنے سے کم از کم 25 لوگوں کی موت ہو گئی ہے۔ اس میں روہتاس میں 6، بھاگلپور میں 4، جہان آباد، بکسر اور جموئی میں 3-3، بانکا میں 2، جبکہ گیا، اورنگ آباد، شیوہر، کھگڑیا، کٹیہار اور بھبھوا میں ایک ایک شخص کی موت ہوئی ہے۔ ان میں چار خواتین اور دو بچیاں شامل ہیں۔ مہلوکین میں بیشتر کھیت میں کام کرنے والے کسان اور مزدور ہیں۔
آسمان سے برسی آفت کا سب سے زیادہ اثر بہار کے روہتاس ضلع میں ہوا ہے جہاں منگل کے روز موسلادھار بارش اور بجلی گرنے سے ضلع کے الگ الگ علاقوں میں دو خواتین سمیت 6 لوگوں کی موت ہو گئی۔ منگل کی دوپہر کرگہر میں وِملا دیوی نامی ایک خاتون کی موت آسمانی بجلی گرنے سے ہو گئی۔ اس کے ساتھ ہی روہتاس تھانہ حلقہ کے نگر ٹولی میں راج کماری دیوی کی موت بھی بجلی گرنے سے ہی ہوئی۔ علاوہ ازیں داوَتھ میں رنجن یادو نامی کسان کی موت بھی آسمانی بجلی کی زد میں آنے سے ہو گئی۔ سوریہ پورہ کے پڈریا میں 18 سالہ پپو کمار کی موت کا سبب بھی آسمانی بجلی ہی رہا۔
جہان آباد میں آسمانی بجلی کی زد میں آنے سے تین لوگوں کی موت کی اطلاع موصول ہوئی ہے۔ یہاں پرس بگہا تھانہ حلقہ کے تتائی بگہا گاؤں میں ایک نوجوان گوپال کمار، کاکو تھانہ حلقہ کے جنوبی گاؤں میں مویشی چرانے گئے انوج پاسوان کی موت آسمانی بجلی سے ہوئی ہے، جبکہ ہلاس گنج تھانہ حلقہ کے رستم چک گاؤں میں آسمانی بجلی کی زد میں آنے سے رام چندر بند نامی شخص کی موت ہو گئی۔
بہار کے وزیر اعلیٰ نتیش کمار نے آسمانی بجلی کی زد میں آ کر لوگوں کی ہوئی اموات پر شدید غم کا اظہار کیا ہے۔ وزیر اعلیٰ نتیش کمار نے کہا ہے کہ آفت کی اس گھڑی میں وہ متاثرہ کنبوں کے ساتھ ہیں۔ وزیر اعلیٰ نے متاثرہ کنبہ کو 4-4 لاکھ روپے امدادی رقم دینے کا اعلان کیا ہے۔ اس کے ساتھ ہی انھوں نے لوگوں سے اپیل کی ہے کہ خراب موسم اور آسمانی بجلی کو لے کر ڈیزاسٹر مینجمنٹ محکمہ کے وقت وقت پر جاری کیے گئے مشوروں پر عمل کریں۔
