ایودھیا میں رام مندر تعمیر کا کام اب تیزی کے ساتھ آگے بڑھ رہا ہے۔ میڈیا رپورٹس کے مطابق مندر کے انڈرگراؤنڈ کی چھت کا کام مکمل ہو چکا ہے اور اب فرش کی تعمیر کا کام شروع ہو چلا ہے۔ اس کے لیے فرش کی میپنگ کی جا رہی ہے۔ رام مندر کے فرش کے بارے میں بتایا جا رہا ہے کہ اس میں مکرانا کا سنگ مرمر استعمال کیا جائے گا۔ فرش میں مجموعی طور پر 95300 اسکوائر فیٹ سنگ مرمر کا استعمال کیے جانے کا منصوبہ بنایا گیا ہے۔
ایک میڈیا رپورٹ میں بتایا گیا ہے کہ فرش میں جو سنگ مرمر لگے گا اس کی موٹائی 35 ایم ایم ہوگی۔ فرش میں الگ الگ سائز کے سنگ مرمر لگائے جائیں گے جس کے لیے انجینئرنگ میپنگ کرنے میں مصروف ہیں۔ سنگ مرمر کی خوبصورتی بڑھانے کے لیے اس پر ’اِن لے وَرک‘ کیا جا رہا ہے۔ ’اِن لے وَرک‘ میں ماربل کی کھدائی کر اس میں کلر اسٹون لگایا جاتا ہے۔ کلر اسٹون یعنی رنگین پتھر سے پھول پتیاں اور رنگ برنگی مصوری کو سفید ماربل پر اُکیرا جاتا ہے۔ فرش پر لگانے کے بعد یہ کسی بھی عمارت کی خوبصورتی میں اضافہ کرتا ہے۔
رام مندر ٹرسٹ کے رکن ڈاکٹر انل مشرا نے اس سلسلے میں جانکاری دیتے ہوئے بتایا کہ مندر کے فرش کے لیے تقریباً 95300 اسکوائر فیٹ سنگ مرمر کی فراہمی ہو چکی ہے۔ انڈرگراؤنڈ کا کام مکمل ہونے کی بھی جانکاری انھوں نے دی اور کہا کہ فرش کا کام جلد شروع ہو جائے گا۔ پہلی منزل کے گنبد وغیرہ کی تعمیر کی بھی تیاری شروع ہو چکی ہے، یعنی عظیم الشان رام مندر کی تعمیر کے لیے سرگرمیاں مزید تیز ہو گئی ہیں۔
