خلیجِ بنگال میں بننے والا طاقتور گردابی طوفان ’مونتھا‘ تیزی سے آندھرا پردیش کے ساحلی علاقوں کی طرف بڑھ رہا ہے۔ محکمۂ موسمیات کے مطابق یہ طوفان آئندہ 24 گھنٹوں کے اندر، یعنی 28 اکتوبر کی رات کو کاکیناڈا کے نزدیک مچھلی پٹنم اور کلنگا پٹنم کے درمیان ساحل سے ٹکرانے کا امکان ہے۔
محکمۂ موسمیات نے اپنی تازہ رپورٹ میں کہا ہے کہ ’مونتھا‘ نے پچھلے چھ گھنٹوں کے دوران تقریباً 13 کلومیٹر فی گھنٹہ کی رفتار سے شمال مغربی سمت میں پیش قدمی کی ہے اور یہ 28 اکتوبر کی صبح تک ایک شدید گردابی طوفان میں تبدیل ہو سکتا ہے۔
اُدھر اوڈیشہ کے گنجام ضلع میں انتظامیہ نے آندھرا پردیش کے 100 سے زیادہ ماہی گیروں کو پناہ دی ہے جو سمندر میں طوفان کی شدت کے سبب پھنس گئے تھے۔ ماہی گیر اپنی 28 کشتیوں کے ساتھ گوپالپور بندرگاہ پہنچے، جہاں ضلع انتظامیہ نے بندرگاہ کے عہدیداروں سے بات چیت کے بعد انہیں محفوظ علاقے میں رہنے کی اجازت دی۔
طوفان کے پیشِ نظر آندھرا پردیش، اوڈیشہ، تمل ناڈو، پڈوچیری اور چھتیس گڑھ میں قومی آفات سے نمٹنے والی فورس (این ڈی آر ایف) کی 22 ٹیمیں تعینات کی گئی ہیں۔ این ڈی آر ایف کے ڈپٹی انسپکٹر جنرل (آپریشنز) محسن شہیدی کے مطابق تمام متاثرہ علاقوں میں ٹیمیں متحرک ہیں اور مقامی انتظامیہ کے ساتھ مل کر حفاظتی اقدامات کر رہی ہیں۔
گنجام کے ضلع کلیکٹر وی۔ کیرتی واسن نے بتایا کہ ضلع میں 110 پناہ گاہیں تیار کی گئی ہیں، نازک علاقوں سے لوگوں کو نکالنے کا کام جاری ہے اور حاملہ خواتین کی خصوصی دیکھ بھال کی جا رہی ہے۔ پیر کو ضلع میں نارنجی الرٹ اور منگل کو ریڈ الرٹ جاری کیا گیا ہے۔
گردابی طوفان کے خطرے کے باعث ریلوے نے دو درجن سے زیادہ ٹرینیں منسوخ کر دی ہیں جبکہ کئی ٹرینوں کے روٹ تبدیل کیے گئے ہیں۔ ان میں وشاکھا پٹنم، کوراپٹ، راجمندری، کاکینادا، تروپتی، گنٹور اور برہم پور کے درمیان چلنے والی متعدد ایکسپریس اور مسافر ٹرینیں شامل ہیں۔
محکمۂ موسمیات نے اطلاع دی ہے کہ طوفان ’مونتھا‘ کے اثرات مہاراشٹر کے ودربھ علاقے تک پہنچ سکتے ہیں، جہاں 28 سے 30 اکتوبر کے درمیان درمیانی سے شدید بارش کا امکان ہے۔ چندرپور، وردھا، یوت مال، بھنڈارا اور ناگپور میں تیز ہواؤں کے ساتھ گرج چمک کی پیش گوئی کرتے ہوئے ’ییلو الرٹ‘ جاری کیا گیا ہے۔
آندھرا اور اوڈیشہ کے ساحلی علاقوں میں حکومت نے پہلے ہی ماہی گیروں کو سمندر میں نہ جانے کی ہدایت دے دی ہے۔ بنگال کی خلیج میں لہروں کی شدت بڑھ چکی ہے اور مقامی انتظامیہ نے طوفان کے راستے میں آنے والے تمام علاقوں میں ہنگامی تیاریاں تیز کر دی ہیں۔
