نیوہمپشائر پرائمری میں ٹرمپ نے نکی ہیلی کو شکست دے دی

نیویارک : سابق امریکی صدر ڈونلڈ ٹرمپ نے مسلسل تیسری بار صدارتی نامزدگی جیتنے کی جانب ایک بڑی کامیابی حاصل کی ہے۔ انہوں نے نیو ہیمپشائر میں جنوبی کیرولینا کی سابق گورنر نِکی ہیلی کو پرائمری انتخابات میں شکست دی ہے۔امریکی چینل سی این این کے مطابق اقوام متحدہ کے لیے سابق سفیر نِکی ہیلی نے ریپبلکن کی جانب سے صدارتی دوڑ میں رہنے کا عزم ظاہر کرتے ہوئے کہا کہ وہ اب آبائی ریاست جنوبی کیرولینا میں 24 فروری کو ہونے والے پرائمری انتخابات پر توجہ مرکوز کریں گی۔ ٹرمپ نے نِکی ہیلی کے فوراً بعد سٹیج پر تقریر کرتے ہوئے کہا کہ ’انہیں جیتنا تھا تاہم وہ بری طرح ناکام ہو گئیں۔‘اگلا مقابلہ 24 فروری کو ساؤتھ کیرولینا میں ہو گا جہاں نِکی ہیلی کی پیدائش ہوئی تھی اور دو مرتبہ گورنر کے طور پر خدمات انجام دیں۔ تاہم اس سب کے باوجود ٹرمپ کو ریاست کی زیادہ تر ریپبلکن شخصیات کی حمایت ملی ہے۔خبر رساں ادارے روئٹرز کے مطابق منگل کو ٹرمپ کی جیت کے باوجود ایگزٹ پولز نے عام انتخابات کی مہم میں ممکنہ کمزوریوں کی جانب اشارہ کیا ہے۔ ان کو متعدد مقدمات میں مجرمانہ الزامات کا سامنا ہے جن میں ان کی 2020 کی شکست کو پلٹنے کی کوششیں اور 2021 میں وائٹ ہاؤس چھوڑنے کے بعد خفیہ دستاویزات کو اپنے ساتھ رکھنا شامل ہے۔تحقیقاتی ادارے ایڈیسن ریسرچ کا کہنا ہے کہ ریپبلکن پرائمری میں حصہ لینے والے تقریباً نصف ووٹروں نے کہا ہے کہ اگر ٹرمپ عدالت میں مجرم ٹھہرائے جاتے ہیں تو وہ صدارت کے اہل نہیں ہوں گے۔