ایل پی جی سلنڈر کی قیمت میں 100 روپے کی تخفیف۔خواتین کے عالمی دن پروزیر اعطم کا تحفہ

نئی دہلی: خواتین کے عالمی دن کے موقع پر وزیر اعظم نریندر مودی نے اعلان کیا ہے کہ ایل پی جی سلنڈر کے داموں میں 100 روپے کی تخفیف کی گئی ہے۔ انہوں نے کہا کہ اس سے خواتین کی زندگی آسان ہوگی۔ وزیر اعظم مودی نے اس کی اطلاع سوشل میڈیا پلیٹ فارم ایکس پر دی۔وزیر اعظم مودی نے ایکس پر لکھا، ’’آج یوم خواتین کے موقع پر ہم نے ایل پی جی سلنڈر کی قیمتوں میں 100 روپے کی رعایت کا بڑا فیصلہ کیا ہے۔ اس سے نہ صرف خواتین کی زندگی آسان ہونے کے ساتھ ہی کروڑوں خاندانوں کا معاشی بوجھ بھی کم ہوگا۔ یہ قدم ماحولیاتی تحفظ میں بھی مددگار ثابت ہوگا، جس سے پورے خاندان کی صحت بہتر ہوگی۔
اس کے علاوہ خواتین کے عالمی دن پر نیک خواہشات دیتے ہوئے انہوں نے کہا، ’’خواتین کا عالمی دن مبارک ہو! ہم اپنی خواتین کی طاقت، ہمت اور لچک کو سلام پیش کرتے ہیں اور مختلف شعبوں میں ان کی کامیابیوں کو سراہتے ہیں۔ ہماری حکومت تعلیم کاروبار، زراعت، ٹیکنالوجی اور دیگر شعبوں میں اقدامات کے ذریعے خواتین کو بااختیار بنانے کے لیے پرعزم ہے۔ یہ گزشتہ دہائی میں ہماری حصولیابیوں سے بھی ظاہر ہوتا ہے۔اس سے قبل کابینہ کے اجلاس میں فیصلہ لیتے ہوئے حکومت نے اجولا اسکیم کے تحت ایل پی جی سلنڈر پر 300 روپے کی سبسڈی ایک سال کے لیے بڑھا دی تھی۔ اس سے تقریباً 10 لاکھ مستفیدین مستفید ہوں گے، جنہیں ایک سال میں 12 سلنڈروں پر سبسڈی حاصل ہوگی۔