مایاوتی نے رام مندر تقریب کی دعوت قبول کی لیکن تقریب میں شریک نہیں کریں گی

لکھنؤ: بی ایس پی سربراہ مایاوتی کو رام مندر کی تقریب (پران پرتشٹھا) میں شرکت کے لیے مدعو کیا گیا ہے اوردعوت نامہ قبول بھی کر لیا ہے لیکن وہ اس تقریب میں شرکت نہیں کریں گی۔ وی ایچ پی کے مطابق تقریب میں اتر پردیش کے دونوں سابق وزرائے اعلی اکھلیش یادو اور مایاوتی کو مدعو کیا گیا ہے۔جبکہ اکھلیش یادو کا یہ بیان سامنے آیا ہے کہ ایودھیا میں 22 جنوری کو منعقد ہونے والی تقریب کا دعوت نامہ انہیں نہیں ملا ہے۔بہرحال !وی ایچ پی کے انٹرنیشنل ورکنگ صدر آلوک کمار نے میڈیا سے بات کرتے ہوئے کہا، ’’یہ دعوت نامہ اکھلیش یادو کو بذریعہ کورئیر بھیجا گیا تھا۔ اس پر کوئی اختلاف نہیں۔ اگر ان کے دعوے کے مطابق یہ انہیں نہیں ملا تو ہم انہیں دوبارہ دعوت نامہ بھیج سکتے ہیں۔ مایاوتی کو ہمارا دعوت نامہ موصول ہوا ہے۔ انہوں نے اسے قبول کر لیا لیکن تقریب میں شرکت نہیں کریں گی۔ تقریب میں تمام سیاسی جماعتوں کے صدور کو مدعو کیا گیا ہے۔
آلوک کمار کے مطابق صدر دروپدی مرمو اور نائب صدر جگدیپ دھنکھڑ کو بھی 22 جنوری کو ہونے والی تقریب میں مدعو کیا گیا ہے لیکن وہ نہیں آئیں گے۔ کیونکہ صدر اور نائب صدر کے سفر کے حوالے سے بہت سے پروٹوکول ہوتے ہیں۔ تاہم یہ دونوں رام مندر ٹرسٹ سے بات چیت کے بعد مناسب تاریخ پر ایودھیا آئیں گے۔ وی ایچ پی دعوت نامے تقسیم کرنے میں رام مندر ٹرسٹ کی مدد کر رہی ہے۔واضح رہے کہ رام مندر ٹرسٹ کی جانب سے کانگریس صدر ملکارجن کھڑگے، سونیا گاندھی اور ادھیر رنجن چودھری کو 22 جنوری کو ایودھیا آنے کے لیے دعوت نامہ بھیجا گیا تھا لیکن کانگریس کی اعلیٰ قیادت نے اس دعوت کو مسترد کرتے ہوئے اسے بی جے پی کا سیاسی پروگرام قرار دیا۔