پورنیہ میں باراتیوں سے بھری کار سڑک پر کھڑے ٹرک سے ٹکرائی، 2 بچیوں سمیت 5 افراد ہلاک، 4 کی حالت نازک

باراتیوں سے بھری ایک آرٹیگا کار کی آج سڑک کنارے کھڑے ٹرک سے شدید ٹکر ہو گئی۔ یہ حادثہ این ایچ 31 پر پورنیہ شہری علاقہ کے مرنگا تھانہ کے نزدیک پیش آیا۔ ٹکر اتنی شدید تھی کہ کار کے پرخچے اڑ گئے اور اس میں سوار 2 بچیوں سمیت 5 لوگوں کی موت ہو گئی۔ اس حادثہ میں 9 افراد زخمی بھی ہوئے ہیں جن میں سے 4 کی حالت نازک بتائی جا رہی ہے۔مہلوکین کے بارے میں بتایا جا رہا ہے کہ سبھی کا تعلق ارریہ ضلع سے ہے۔ زخمیوں کو فوری طور پر گورنمنٹ میڈیکل کالج اسپتال پورنیہ میں داخل کرایا گیا ہے۔ دو زخمیوں کو ہایر سنٹر ریفر کیے جانے کی خبریں بھی موصول ہو رہی ہیں۔ مہلوکین کے نام ہیں محمد اسحاق، محمد جلیل، محمد اشتیاق، صوفیہ، گل جبیں۔میڈیا رپورٹس کے مطابق بارات ارریہ ضلع سے مہلگاؤں تھانہ حلقہ کے بھنسیا گاؤں سے کھگڑیا ضلع کے مانسی جا رہی تھی۔ پولیس نے سبھی مہلوکین کی لاشوں کو قبضے میں لے کر پوسٹ مارٹم کرایا اور پھر اسے رشتہ داروں کے حوالے کر دیا۔ حادثہ کے بعد دولہا اور دلہن دونوں کے ہی خاندانوں میں افرا تفری کا عالم پیدا ہو گیا۔بارات کھگڑیا ضلع کے مانسی واقع وندنا گاوٌں میں محمد سید کے یہاں جا رہی تھی۔ بارات میں شامل کچھ دیگر گاڑیاں آگے نکل چکی تھیں۔ جس کارٹیگا کار کا حادثہ ہوا ہے اس میں نصف درجن بچے و بچیوں سمیت 14 افراد سوار تھے۔ پورنیہ بائپاس مرنگا کے نزدیک تھانہ سے محض 100 میٹر پہلے ڈرائیور نے اچانک گاڑی پر کنٹرول گنوا دیا اور سڑک کنارے کھڑے ٹرک میں ٹکر مار دی۔ ٹکر کی زوردار آواز سن کر مرنگا تھانہ کے افسر پنکج آنند اور دیگر پولیس افسر کے ساتھ ساتھ مقامی لوگ جائے حادثہ کی طرف دوڑے اور سبھی لوگوں کو گاڑی سے باہر نکالا گیا۔ سبھی کو فوراً جی ایم سی ایچ لے جایا گیا۔ اسپتال میں پہنچتے ہی تین لوگوں کو مردہ قرار دے دیا گیا جبکہ دو کی موت علاج کے دوران ہوئی۔