واشنگٹن: امریکہ کی 9 ریاستوں میں برفباری، یخ بستہ ہواؤں اور جما دینے والی سردی میںمرنے والوں کی تعداد83 ہوچکی ہے۔ میڈیا کے مطابق امریکہ کی 9 ریاستوں میں گزشتہ ہفتے سے جاری برفباری اور سرد ترین موسم نے ریاست ٹینیسی میں 19، اوریگون میں 16 جبکہ الینوائے، پنسلوانیا، مسیسیپی، واشنگٹن، کینٹکی، وسکونسن، نیویارک اور نیو جرسی میں 48 افراد کی جان لے لی۔زیادہ تر ہلاکتیں سڑکوں پر پڑی برف کے باعث پھسلن کے باعث سے گاڑیوں کے حادثات کا شکار ہونے کی وجہ سے ہوئی ہیں جبکہ درختوں اور ہورڈنگز کے گرنے سے بھی ہلاکتیں ہونے کی خبریں ہیں۔ بجلی کا نظام درہم برہم ہوگیا اور ٹریفک معطل ہے۔ان ریاستوں کے ہاسپٹل فلو، نزلہ، بخار، سینے اور پھیپھڑوں کے انفیکشن میں مبتلا مریضوں سے بھر گئے جبکہ تعلیمی اور کاروباری سرگرمیاں نہ ہونے کے برابر ہیں۔ شہریوں کو بلا ضرورت گھر نہ نکلنے کی ہدایت کی گئی ہے۔ماحولیاتی تبدیلیوں اور موسمی تغیرات کی وجہ سے دنیا کو غیر معمولی اور غیر متوقع درجہ حرارت، بارش، سیلاب، برفباری، گرمی اور سردی کی لہر کا سامنا ہے جس سے دنیا بھر میں ہلاکتوں میں ہر سال اضافہ ہوتا جا رہا ہے۔
