مہاراشٹر کی راجدھانی ممبئی میں برہن ممبئی میونسپل کارپوریشن کا میئر پہلی بار بی جے پی سے ہونے جارہا ہے۔ اس دوران حاصل معلومات کے مطابق ریتو تاوڑے بی ایم سی کی اگلی میئر ہوں گی۔ ریتو تاوڑے بی جے پی کی سینئر کارپوریٹر ہیں۔ وہیں شیو سینا (ایکناتھ شندے گروپ) کے سنجے شنکر گھاڑی بی ایم سی کے ڈپٹی میئر ہوں گے۔
ریتو تاوڑے نے 2012 میں وارڈ نمبر 127 سے کامیابی حاصل کی تھی اور 2017 میں وہ پہلی بار گھاٹ کوپر وارڈ نمبر 121 سے منتخب ہوئی تھیں۔ اس کے بعد انہوں نے 2025 کے انتخابات میں وارڈ نمبر 132 سے جیت درج کی۔ ریتو تاوڑے ممبئی میونسپل کارپوریشن کی ایجوکیشن کمیٹی کی چیئرپرسن رہ چکی ہیں، جہاں انہوں نے تعلیم سے متعلق کئی اہم فیصلوں میں کردار ادا کیا۔
وہیں شیو سینا نے برہن ممبئی میونسپل کارپوریشن کے ڈپٹی میئر کے عہدے کے لیے سنجے شنکر گھاڑی کو اپنا امیدوار بنانے کا اعلان کیا ہے۔ پارٹی کی طرف سے جاری کردہ ایک پریس ریلیز کے مطابق شیوسینا کے چیف لیڈر اور مہاراشٹر کے نائب وزیر اعلیٰ ایکناتھ شندے کے حکم پر شیوسینا- بی جے پی مہایوتی کے باضابطہ امیدوار کے طور پر سنجے شنکر گھاڑی کے نام کا اعلان کیا گیا ہے۔ ڈپٹی میئر کا یہ عہدہ ڈیڑھ سال کی مدت کے لیے ہوگا۔
ممبئی میونسپل کارپوریشن کے انتخابی نتائج میں بی جے پی 89 سیٹیں جیت کر سب سے بڑی پارٹی بنی ہے ویں شیو سینا(شنڈے گروپ) نے 29 سیٹیں حاصل کی ہیں، جس کی حمایت سے مہایوتی اکثریت کے بہت قریب پہنچ گئی ہے۔ اسی سیاسی مساوات کے تحت یہ طے مانا جارہا تھا کہ میئر کا عہدہ بی جے پی کے پاس جائے گا اور ڈپٹی میئر کا عہدہ شیو سینا (شندے گروپ) کوملے گا۔
