راجدھانی دہلی اور پنجاب میں برسر اقتدار عآپ نے بدھ کے روز اعلان کیا کہ وہ مودی حکومت کے ذریعہ بحث میں لائے گئے یونیفارم سول کوڈ کی حمایت کرے گی۔ حالانکہ عآپ کا کہنا ہے کہ اس قانون کو وسیع پیمانہ پر صلاح و مشورہ کے بعد ہی نافذ کیا جانا چاہیے۔
عآپ کے راجیہ سبھا رکن سندیپ پاٹھک نے کہا کہ چونکہ آئین کی شق 44 یونیفارم سول کوڈ (یو سی سی) کی وکالت کرتا ہے، اس لیے ان کا ماننا ہے کہ اسے نافذ کیا جانا چاہیے۔ پاٹھک نے کہا کہ ’’اصولی طور سے ہم یونیفارم سول کوڈ کی حمایت کرتے ہیں۔ شق 44 بھی اس کی حمایت کرتا ہے۔ چونکہ یہ سبھی مذاہب سے جڑا ہے، اس لیے اسے وسیع صلاح و مشورہ کے بعد ہی نافذ کیا جانا چاہیے۔
یہ پوچھے جانے پر کہ کیا وہ 2024 کا لوک سبھا انتخاب کانگریس کے ساتھ مل کر لڑیں گے، انھوں نے کہا کہ یہ سب پرانی پارٹی کے رویے پر منحصر کرتا ہے۔ پاٹھک نے کہا کہ موجودہ حالات بتاتے ہیں کہ سبھی اپوزیشن پارٹیوں کو ایک ساتھ آ کر مودی حکومت کے خلاف لڑنا چاہیے، لیکن یہ کانگریس پر منحصر کرتا ہے۔
پاٹھک کا کہنا ہے کہ ’’ہم مضبوطی سے انتخاب لڑیں گے، لیکن اتحاد کانگریس کے رخ پر منحصر کرے گا۔ کیجریوال نے کئی اپوزیشن پارٹیوں سے ملاقات کی اور سبھی نے ان کی حمایت کی۔ حالانکہ کانگریس نے اپنا رخ واضح نہیں کیا۔‘‘ پاٹھک نے کہا کہ ایک میٹنگ بلائی گئی تھی اور اس میں ہریانہ کے لیڈران بھی شامل ہوئے تھے۔ ہم جلد ہی 2024 کے انتخابات کو لے کر ایک بڑی مہم شروع کریں گے۔
