تلنگانہ کے مقامی بلدیاتی انتخابات میں کانگریس کو حاصل ہونے والی نمایاں کامیابی پر پارٹی قیادت نے اسے ریاستی حکومت کی عوامی فلاح پر مبنی پالیسیوں کی منظوری قرار دیا ہے۔ کانگریس رہنما راہل گاندھی نے انتخابی نتائج کے بعد جاری اپنے بیان میں کہا کہ یہ نتیجہ صاف ظاہر کرتا ہے کہ عوام نے سماجی انصاف، باعزت زندگی اور سب کو ساتھ لے کر ترقی کے نظریہ کی حمایت کی ہے۔ ان کے مطابق یہ جیت دراصل عوام کے اعتماد کی جیت ہے۔
راہل گاندھی نے کہا کہ تلنگانہ بلدیاتی انتخابات میں کامیابی کانگریس حکومت کی ’پیپل فرسٹ‘ یعنی عوام کو اولین ترجیح دینے والی پالیسیوں کی توثیق ہے۔ انہوں نے زور دے کر کہا کہ پارٹی کا مقصد ’پرجالا تلنگانہ‘ کی تشکیل ہے، جہاں ترقی کے ثمرات ہر خاندان تک پہنچیں اور کسی بھی طبقے کو نظرانداز نہ کیا جائے۔ انہوں نے ریاستی قیادت اور کارکنان کا شکریہ ادا کرتے ہوئے کہا کہ یہ کامیابی زمینی سطح پر مسلسل محنت کرنے والے کارکنان اور عوام کے تعاون کا نتیجہ ہے۔
ریاست میں 11 فروری کو 116 بلدیاتی اداروں کے 2582 وارڈوں میں ووٹنگ ہوئی تھی۔ نتائج کے مطابق کانگریس نے 1300 سے زائد وارڈوں میں کامیابی حاصل کی جو سب سے بڑا عدد رہا۔ بھارت راشٹر سمیتی تقریباً 700 وارڈوں تک محدود رہی جبکہ بھارتیہ جنتا پارٹی نے بھی تقریباً 275 وارڈ جیت کر اپنی موجودگی درج کرائی۔ مجموعی طور پر کانگریس نے واضح برتری حاصل کرتے ہوئے مقامی سطح پر اپنی گرفت مضبوط کی ہے۔
ان نتائج کو اے ریونت ریڈی کی قیادت والی ریاستی حکومت کے لیے سیاسی تقویت کے طور پر دیکھا جا رہا ہے۔ بلدیاتی انتخابات کو عموماً حکومت کی کارکردگی پر عوام کی براہ راست رائے سمجھا جاتا ہے۔ کانگریس کی بڑی جیت نے یہ اشارہ دیا ہے کہ شہری اور مقامی سطح پر پارٹی کا اثر و رسوخ بڑھا ہے۔
