مودی حکومت کی کابینہ نے بدھ کے روز دہلی میٹرو کے فیز 5اے کے تحت تین نئے کوریڈورز کو منظوری دے دی۔ اس مرحلے کے مکمل ہونے کے بعد دہلی میٹرو کے نیٹ ورک میں مزید 16.076 کلو میٹر کا اضافہ ہوگا اور مجموعی لمبائی 400 کلو میٹر سے تجاوز کر جائے گی۔ اس پورے منصوبے پر تقریباً 12015 کروڑ روپے کی لاگت آئے گی اور اسے تین سال میں مکمل کرنے کا ہدف رکھا گیا ہے۔مرکزی وزیر اشونی ویشنو نے کابینہ کے فیصلوں کی جانکاری دیتے ہوئے کہا کہ فیز 5اے کے تحت 13 نئے میٹرو اسٹیشن تعمیر کیے جائیں گے، جن میں 10 زیر زمین اور 3 بلند سطح پر قائم ہوں گے۔ ان نئے کوریڈورز کے ذریعے قومی راجدھانی میں سفری سہولتوں کو مزید بہتر بنانے اور مختلف علاقوں کے درمیان براہ راست رابطہ قائم کرنے کا مقصد ہے۔
پہلا کوریڈور رام کرشن آشرم مارگ سے اندرا پرستھ تک تعمیر کیا جائے گا، جس کی لمبائی تقریباً 9.913 کلو میٹر ہوگی اور اس پر 9570 کروڑ روپے خرچ ہونے کا تخمینہ ہے۔ یہ راستہ کناٹ پلیس کے علاقے سے گزرتا ہوا شیواجی اسٹیڈیم، مرکزی سیکریٹریٹ، کرتویہ بھون، انڈیا گیٹ اور بھارت منڈپم جیسے اہم مقامات کو جوڑے گا۔ اس کوریڈور سے روزانہ تقریباً ساٹھ ہزار سرکاری ملازمین اور دو لاکھ کے قریب زائرین کو فائدہ پہنچنے کی توقع ہے۔
دوسرا کوریڈور ایئروسٹی سے اندرا گاندھی بین الاقوامی ہوائی اڈے کے ٹرمینل ایک تک ہوگا، جس کی لمبائی 2.263 کلو میٹر اور لاگت 1419.6 کروڑ روپے رکھی گئی ہے۔ اس سے ہوائی مسافروں کو ایئروسٹی اور ٹرمینل ایک کے درمیان براہ راست میٹرو رابطہ میسر آئے گا، جبکہ ٹرمینل تین پہلے ہی میٹرو سے منسلک ہے۔
تیسرا کوریڈور تغلق آباد سے کالندی کنج تک تعمیر ہوگا، جس کی لمبائی 3.9 کلو میٹر اور لاگت 1024.8 کروڑ روپے ہوگی۔ اس سے مجینٹا اور وائلٹ لائن آپس میں جڑ جائیں گی اور نوئیڈا، فرید آباد اور گروگرام جانے والے مسافروں کو بڑی سہولت ملے گی۔فی الحال دہلی اور این سی آر میں دہلی میٹرو ریل کارپوریشن کے تحت تقریباً 395 کلو میٹر طویل 12 میٹرو لائنیں چل رہی ہیں، جن میں 289 اسٹیشن شامل ہیں۔ اس نئی منظوری کے بعد دہلی میٹرو نہ صرف ہندوستان بلکہ دنیا کے بڑے میٹرو نیٹ ورکس میں اپنی جگہ مزید مضبوط کرے گی۔
