یوپی پولیس بھرتی کے امتحان کا آج آخری دن

لکھنؤ : اتر پردیش پولیس ریکروٹمنٹ اینڈ پروموشن بورڈ، لکھنؤ کی طرف سے ریزرو سول پولیس کے عہدوں پر براہ راست بھرتی کے لیے تحریری امتحان کے دوسرے مرحلے کا آج آخری دن ہے۔ یہ امتحان پولیس کمشنریٹ گوتم بدھ نگر کے 18 مراکز پر جاری ہے۔ دو شفٹوں میں منعقد کیے جانے والے اس امتحان کو پرامن طریقہ سے مکمل کرانے کے لیے پولیس نے وسیع انتظامات کیے ہیں۔دوسری شفٹ کے امتحان کا آج آخری دن ہے۔ یہ امتحان سی سی ٹی وی کیمروں کی نگرانی میں منعقد کیا جا رہا ہے، جو دو شفٹوں، صبح 10.00 بجے سے دوپہر 12.00 بجے تک اور سہ پہر 3.00 بجے سے 5.00 بجے تک جاری رہے گا۔ امتحان کے آزادانہ، منصفانہ، غیر جانبدار اور ہموار انعقاد کے لیے کمشنریٹ گوتم بدھ نگر پولیس کے ذریعہ پولیس بھرتی بورڈ کے معیار کے مطابق کل 18 امتحانی مراکز پر پولیس سنٹر انچارج اور سی سی ٹی وی انچارج کی ڈیوٹی لگائی گئی ہے۔
اس کے علاوہ امتحانی مرکز کے حفاظتی انتظامات کے لیے ضروری پولیس فورس بھی تعینات کی گئی ہے۔ آج 31 اگست کو پولیس کمشنر گوتم بدھ نگر لکشمی سنگھ کی ہدایت پر ایڈیشنل ڈپٹی کمشنر آف پولیس نوئیڈا منیش کمار مشرا نے بھی کمشنریٹ گوتم بدھ نگر میں یوپی پولیس کے مختلف امتحانی مراکز کا دورہ کیا، سیکورٹی انتظامات کا جائزہ لیا اور متعلقہ پولیس افسران اور ملازمین کو ضروری ہدایات دیں۔ اس کے علاوہ انہوں نے امتحانی مراکز میں نصب سی سی ٹی وی کیمروں کا بھی معائنہ کیا۔
انہوں نے امتحانی مرکز میں ڈیوٹی پر مامور پولیس اہلکاروں کو ہدایت کی کہ وہ اپنی ڈیوٹی احتیاط سے انجام دیں اور اس بات کو یقینی بنائیں کہ تمام امیدوار ریکروٹمنٹ ایگزامینیشن بورڈ کی جانب سے جاری کردہ ہدایات پر عمل کریں۔ اس موقع پر پولیس فورس کو امتحانی مرکز کے ارد گرد ٹریفک کے نظام کو برقرار رکھنے، امتحانی مرکز کے قریب غیر ضروری بھیڑ جمع نہ ہونے دینے اور امتحان پرامن طریقے سے منعقد کرنے کے لیے ضروری ہدایات دی گئیں۔