لالو کے ملک گیر دورے کے اعلان سے بی جے پی میں کھلبلی ۔سید ابو دوجانہ

پٹنہ : راشٹریہ جنتادل(آر جے ڈی ) کے سابق رکن اسمبلی ا ور پارٹی کے سینیئر لیڈر سید ابو دوجانہ نے کہاہے کہ آر جے ڈی کے قومی صدر اور سماجواد کے اہم ستون لالو یادو کے اس اعلان کے بعد کہ وہ اب جلد ہی پورے ملک کا دورہ کرنے والے ہیں، وزیراعظم نریندر مودی اور بی جے پی خیمہ میں کھلبلی مچ گئی ہے ۔
سید ابو دوجانہ نے کہا کہ آئندہ لوک سبھا انتخاب میں مودی کی شکست یقینی ہے ، اس لیے کہ عوام بہت پریشان ہوچکے ہیں ، مہنگائی، بے روزگاری اتنی بڑھ گئی ہے کہ عوام کا جینا محال ہوچکا ہے ، اس لیے اپوزیشن جماعتوں نے اتحاد کا فیصلہ کیا اور بالآخر اس کا مثبت نتیجہ یہ ہوا کہ چند ماہ کے اندر ہی انڈیا اتحاد وجود میں آگیا ۔
انہوں نے کہا کہ اس اتحاد سے بھی اتنی بے چینی ہوئی کہ انڈیا کو ہی مودی خارج کرنے میں جٹ گئے ۔ لیکن لالو یادو ہمیشہ اس بات کا اعادہ کرتے رہے ہیں کہ مودی کو شکست دینا آسان ہے بس ضرورت اس بات کی ہے کہ عوام کو سیاسی طور پر بیدار کیا جائے ۔ لالو یادو اس مشن کو قومی مشن بنانے میں جٹ گئے ہیں اور لالو یادو کی یاترا سے یہ تو یقینی ہے کہ 2024 میں مودی کو اقتدار سے بے دخل کر دیا جائے گا۔