واشنگٹن: ریاستہائے متحدہ کے 75 سینیٹرز (ارکان پارلیمنٹ) اور ڈیموکریٹک پارٹی کے کانگریسی نمائندوں نے امریکی صدر جو بائیڈن کو ایک خط لکھ ہندوستان کے پریشان کن مسائل کا ذکر کیا ہے۔ ارکان پارلیمنٹ نے امریکی صدر جو بائیڈن پر زور دیا ہے کہ وہ وزیر اعطم مودی کے سامنے انسانی حقوق کا مسئلہ اٹھائیں۔
امریکہ کے ان تمام قانون سازوں کا کہنا ہے کہ ہندوستانی وزیر اعظم نریندر مودی کو ریاستی دورے کے دوران خوش آمدید کہا جانا چاہیے لیکن ساتھ ہی ہندوستان سے موجودہ خدشات پر بھی بات کی جانی چاہیے، تاکہ دونوں ممالک کے تعلقات مضبوط ہو سکیں۔امریکی قانون سازوں نے کہا کہ وہ ہندوستان میں مذہبی عدم برداشت، آزادی صحافت، انٹرنیٹ کی بندش اور سول سوسائٹی کے گروپوں کو نشانہ بنانے کے بارے میں فکر مند ہیں۔ امریکی محکمہ خارجہ اور سول سوسائٹی کی تنظیموں کی رپورٹوں کا حوالہ دیتے ہوئے انہوں نے صدر سے کہا ہے کہ وہ مذہبی عدم برداشت میں اضافے، سول سوسائٹی کی تنظیموں اور صحافیوں کو نشانہ بنانے، آزادی صحافت پر بڑھتی ہوئی پابندیوں اور انٹرنیٹ تک رسائی جیسے اہم مسائل پر توجہ دیں۔ انہوں نے کہا کہ ان مسائل کو نمایاں طور پر وزیر اعظم مودی کے سامنے رکھنا چاہئے اور کھل کر بات کرنی چاہئے۔
امریکی قانون سازوں نے اپنے خط میں لکھا کہ ’’ہم کسی خاص ہندوستانی رہنما یا سیاسی جماعت کی حمایت نہیں کرتے، یہ ہندوستانی عوام کا فیصلہ ہے لیکن ہم ان اہم اصولوں پر قائم ہیں جو امریکی خارجہ پالیسی کا بنیادی حصہ ہیں۔‘‘ خط میں کہا گیا ’’ہم چاہیں گے کہ وزیر اعظم مودی کے ساتھ آپ کی ملاقات کے دوران، آپ ہمارے دو عظیم ممالک کے درمیان کامیاب، مضبوط اور طویل مدتی تعلقات کے لیے اہم مسائل کے مکمل پہلو پر تبادلہ خیال کریں۔‘‘
یہ خط منگل کو وائٹ ہاؤس کو بھیجا گیا تھا اور اس کی اطلاع سب سے پہلے رائٹرز نے دی تھی۔ وزیر اعظم نریندر مودی سال 2014 میں وزیر اعظم بننے کے بعد سے پانچ بار ریاستہائے متحدہ امریکہ جا چکے ہیں لیکن یہ ان کا پہلا سرکاری ریاستی دورہ ہے۔
