پنجاب پولیس کے معطل اے آئی جی کے ہاتھوں داماد کا گولی مار کرقتل

چنڈی گڑھ: چنڈی گڑھ ڈسٹرکٹ کورٹ میں ہفتہ کو ایک سنسنی خیز واقعہ میں پنجاب پولیس کے معطل اے آئی جی نے اپنے داماد کو گولی مار کر ہلاک کر دیا۔ رپورٹ کے مطابق معطل شدہ اے آئی جی مالوندر ایس سدھو نے زمین کے تنازعہ کی وجہ سے اپنے داماد کی جان لی۔ واقعے کے وقت دونوں فریقین سماعت کے لیے عدالت میں آئے تھے۔ جس کے بعد پولیس نے ملزم سدھو کو گرفتار کر کے مقدمہ درج کر لیا اور مزید کارروائی شروع کر دی۔ متوفی ایک آئی آر ایس افسر تھا اور دونوں فریقوں میں موہالی میں زمین کا تنازع چل رہا تھا، جو عدالت میں زیر سماعت ہے۔
جانکاری دیتے ہوئے چنڈی گڑھ کی ایس ایس پی کنور دیپ کور نے کہا، ’’ہمیں آج دوپہر دو بجے کے قریب ڈسٹرکٹ کورٹ کے ثالثی مرکز میں فائرنگ کی اطلاع ملی۔ پولیس موقع پر پہنچی تو پتہ چلا کہ متاثرہ کا نام ہرپریت سنگھ ہے اور اسے زخمی حالت میں اسپتال لے لیا گیا ہے۔ لیکن وہاں اس کی موت ہو گئی۔ مبینہ ملزم کو موقع پر ہی پکڑ لیا گیا اور پولیس حراست میں لے لیا گیا۔ اس کے پاس سے ایک ہتھیار بھی برآمد کیا گیا ہے۔
ایس ایس پی نے بتایا کہ مبینہ ملزم مالویندر سنگھ پنجاب پولیس کا ریٹائرڈ اے آئی جی ہے۔ ایف ایس ایل ٹیم کو طلب کیا گیا ہے اور جائے وقوعہ کا جائزہ لیا جا رہا ہے۔ عینی شاہدین سے بھی بات کی جا رہی ہے۔ اس بات کی تحقیقات کی جا رہی ہیں کہ مبینہ ملزم کس گیٹ سے عدالت میں داخل ہوا۔ ہم نے اس کے پاس سے ایک .32 بور پستول برآمد کیا ہے اور 4 گولیوں کے خول اور 3 غیر استعمال شدہ گولیاں برآمد کی ہیں۔ دونوں خاندانوں کے درمیان طلاق کی کارروائی چل رہی تھی اور آج ثالثی مرکز میں چوتھی ملاقات تھی۔