جیل میں بند ٹھگ سکیش چندرشیکھر نے ایک بار پھر چٹھی لکھی ہے۔ لیکن اس بار چٹھی نہ ہی دہلی کے وزیر اعلیٰ کیجریوال کے تعلق سے ہے، اور نہ ہی بالی ووڈ اداکارہ جیکلین فرنانڈیز کے لیے۔ انھوں نے خط میں اڈیشہ ریل حادثہ میں متاثر ہوئے افراد کو مدد پہنچانے کی پیشکش کی ہے۔ منڈولی جیل میں بند سکیش نے تازہ خط مرکزی وزیر ریل کو لکھا ہے۔ انھوں نے اپنے خط میں اڈیشہ ریل حادثہ میں متاثر ہوئے کنبوں کو معاشی مدد دینے کی پیشکش کی ہے۔ سکیش نے کہا ہے کہ وہ متاثرہ کنبوں کی مدد کے لیے 10 کروڑ روپے کی مالی مدد کرنا چاہتے ہیں۔
سکیش نے اپنے خط میں لکھا ہے کہ اڈیشہ ریل حادثہ کے بارے میں جان کر وہ گزشتہ کئی دنوں سے بہت غمزدہ ہیں۔ وہ حادثے میں جان گنوانے والوں کے اہل خانہ کے لیے دعا کرتے ہیں۔ سکیش کا کہنا ہے کہ وہ ان لوگوں کی مدد کرنا چاہتے ہیں تاکہ ان کے لیے زندگی میں کچھ آسانیاں میسر ہو جائیں۔ انھوں نے وزیر ریل سے ان کی تجویز کو قبول کرنے کی گزارش بھی کی۔
اپنے خط میں سکیش چندرشیکھر نے کہا کہ وہ جن روپیوں سے اڈیشہ ٹرین حادثہ کے متاثرین کی مدد کرنا چاہتے ہیں، وہ اس نے پوری طرح قانونی طریقے سے کمائے ہیں۔ اگر ضرورت پڑی تو اس کے دستاویزات بھی پیش کیے جا سکتے ہیں۔ خط میں سکیش نے وزیر اعظم نریندر مودی کی قیادت میں حکومت نے جو راحت و بچاؤ کام کیے ہیں، ان کی بھی تعریف کی ہے۔
