بہار میں 20 لاکھ 87 ہزار 63 طلبا و طالبات کا رجسٹریشن رَد

پٹنہ :بہار میں محکمہ تعلیم نے مختلف اسکولوں سے غیر حاضر رہنے والے 20 لاکھ 87 ہزار 63 طلبا و طالبات کا رجسٹریشن رَد کر دیا ہے۔ محکمہ افسران نے اس سلسلے میں جانکاری دیتے ہوئے بتایا کہ سب سے زیادہ مظفر پور، ویشالی، مغربی چمپارن و مشرقی چمپارن کے سرکاری اسکولوں میں طلبا غیر حاضر پائے گئے ہیں۔ سب سے کم شیوہر میں 20 ہزار 206 طلبا غیر حاضر ملے۔ اس کے بعد اب محکمہ نے سبھی غیر حاضر بچوں کے خلاف کارروائی کرنے کا فیصلہ کیا۔
جانکاری دی گئی ہے کہ ایسے طلبا و طالبات کے خلاف کارروائی کی گئی ہے جو متعلقہ افسران کی پیشگی اجازت کے بغیر لگاتار 15 دنوں تک اسکول میں غیر حاضر رہے ہیں۔ ان میں 2 لاکھ 66 ہزار 564 طلبا درجہ 9 سے 12 تک کے ہیں۔ اس کارروائی کے بعد ان طلبا و طالبات کو 10ویں اور 12ویں کے بورڈ امتحانات میں تب تک شامل نہیں ہونے دیا جائے گا جب تک کہ ان کے والدین دوبارہ ان کی غلطی نہ دہرانے کا حلف نامہ داخل نہ کر دیں۔
بتایا جاتا ہے کہ محکمہ تعلیم کے ایڈیشنل چیف سکریٹری کے کے پاٹھک کی ہدایت پر اتھارٹی نے ضلع ایجوکیشن افسر اور بلاک ایجوکیشن افسر کو اپنے اپنے حلقہ اختیار میں اسکولوں کا جائزہ لینے اور ضابطوں کی خلاف ورزی کرنے والوں کے خلاف سخت کارروائی کرنے کو کہا ہے۔ کے کے پاٹھک نے بہار کے سبھی ضلعوں کے ضلع مجسٹریٹ کو خط بھیج کر یہ حکم جاری کیا تھا کہ 3 دن تک غائب رہنے والے طلبا کے یہاں پہلے نوٹس جائے گا۔ جو طالب علم 15 دن تک لگاتار غیر حاضر ہو، ان کا رجسٹریشن رد ہوگا۔ اس حکم کا اثر اب دیکھنے کو مل رہا ہے، لیکن تقریباً 21 لاکھ طلبا کا نام اسکول سے کاٹے جانے کے بعد ایک ہنگامہ سا برپا ہو گیا ہے۔ متاثرہ طلبا و طالبات اور ان کے سرپرست پریشان نظر آ رہے ہیں۔