بھبھوا اسمبلی حلقہ میں بی جے پی امیدوار بھرت بِند کو کٹرا کی عوام نے گاؤں میں داخل ہونے سے روک دیا۔میڈیا رپورٹس کے مطابق بھبھوا اسمبلی حلقہ کے کٹرا گاؤں میں بی جے پی امیدوار اور سابق رکن اسمبلی بھرت بِند کی تشہیری مہم کے دوران ہنگامہ ہو گیا۔ بھرت کا راستہ کچھ نوجوانوں نے گاؤں میں داخل ہوتے وقت روک لیا اور ان سے سوال و جواب شروع کر دیا۔ لوگوں کے سوال سے بھرت بچنے کی کوشش کرتے نظر آئے، لیکن عوام کی بھیڑ نے انھیں آگے بڑھنے سے روک دیا۔ اس واقعہ کی ویڈیو سوشل میڈیا پر وائرل ہو رہی ہے۔
ویڈیو میں دیکھا جا سکتا ہے کہ بی جے پی امیدوار بھرت جب لوگوں کے سوالوں سے بچنے کی کوشش کرتے ہیں اور آگے بڑھنے لگتے ہیں، تو ایک نوجوان سامنے آ جاتا ہے۔ بھرت فون پر کسی سے بات بھی کر رہے ہوتے ہیں اور بیچ بیچ میں فون کان سے ہٹا کر لوگوں سے ہٹنے کے لیے بھی کہتے ہیں۔ ایک نوجوان نے ان سے سوال کیا کہ آپ یہاں سے رکن اسمبلی رہے ہیں، اس کے بعد کتنی بار گاؤں میں آئے ہیں؟ بار بار یہ سوال پوچھے جانے پر بی جے پی امیدوار نے کہا کہ کم از کم 10 بار اس گاؤں میں آئے ہیں۔ حالانکہ اس جواب کو وہاں کھڑے کئی لوگوں نے جھوٹ بتایا۔ لوگوں نے کہا کہ وہ مقامی باشندے ہیں اور کبھی بی جے پی امیدوار کو گاؤں میں آتے نہیں دیکھا۔
