بھوپال: مدھیہ پردیش پولیس نے پرویش شکلا نامی اس شخص کو گرفتار کر لیا ہے جس پر ایک قبائلی مزدور کے جسم پر پیشاب کرنے کا الزام ہے۔ ملزم نے یہ حرکت حالت نشہ میں کی تھی اور اس سے پیدا ہونے والے سیاسی تنازعہ کے درمیان وزیر اعلیٰ شیوراج چوہان کو ملزم کے خلاف سخت قومی سلامتی قانون کے تحت معاملہ درج کرنے کا حکم دینا پڑا۔
خیال رہے کہ مدھیہ پردیش کے سیدھی میں پیش آنے والے اس بے حد شرمناک واقعہ کی ویڈیو سوشل میڈیا پر وائرل ہو رہی ہے، جس میں ایک دبنگ شخص قبائلی مزدور کے جسم پر پیشاب کرتا ہوا نظر آ رہا ہے۔ رپورٹ کے مطابق یہ دبنگ بی جے پی رکن اسمبلی کیدار شکلا کا نمائندہ پرویش شکلا ہے، جسے اب گرفتار کر لیا گیا ہے۔
پولیس کے مطابق شکلا گرفتاری سے بچنے کے لیے ایک جگہ سے دوسری جگہ چھپ رہا تھا اور اسے دیر رات گئے 2 بجے پکڑ کر پوچھ گچھ کی گئی۔ اس کے خلاف قومی سلامتی ایکٹ، ایس سی/ایس ٹی ایکٹ اور تعزیرات ہند کی دیگر دفعات کے تحت مقدمہ درج کیا گیا ہے۔ شکلا کی بیوی اور والدین سے بھی تفتیش کے حصے کے طور پر پوچھ گچھ کی گئی۔ جب پولیس کراوندی کے 36 سالہ متاثرہ داسمت راوت کو پوچھ گچھ کے لیے لائی تو اس نے وائرل ویڈیو کو فرضی قرار دیا۔ ایک حلف نامہ تیار کیا گیا جس میں کہا گیا کہ یہ ویڈیو فرضی ہے اور شکلا کو فرضی مقدمے میں پھنسانے کے لیے بنایا گیا تھا۔
تاہم ذرائع کا کہنا ہے کہ حلف نامہ مبینہ طور پر دباؤ کے تحت تیار کیا گیا تھا اور اب تک کسی عہدیدار کو جمع نہیں کیا گیا۔ شکلا کے حکمراں بھارتیہ جنتا پارٹی (بی جے پی) کے ساتھ مبینہ روابط نے اپوزیشن کانگریس کی طرف سے تنقید کی ہے، جس نے دعویٰ کیا کہ یہ چونکا دینے والا واقعہ مدھیہ پردیش میں قبائلی لوگوں کے خلاف تشدد کے وسیع مسئلے کا نتیجہ تھا۔ مدھیہ پردیش کے سابق وزیر اعلیٰ کمل ناتھ نے کہا ’’ریاست کے سدھی ضلع کے ایک قبائلی نوجوان پر پیشاب کرنے والے (ایک شخص) کے ظلم کی ویڈیو منظر عام پر آئی ہے۔ اس گھناؤنی کرتوت کی ایک مہذب معاشرے میں کوئی جگہ نہیں ہے۔
انہوں نے کہا، "اس واقعہ نے پورے مدھیہ پردیش کو شرمندہ کر دیا ہے۔ قصوروار کو سخت سے سخت سزا ملنی چاہئے اور مدھیہ پردیش میں قبائلیوں پر مظالم بند ہونے چاہئیں۔‘‘ سدھی سے بی جے پی کے رکن اسمبلی کیدارناتھ شکلا اور ریوا سے بی جے پی رکن اسمبلی راجندر شکلا کے ساتھ ملزم کی تصاویر منظر عام پر آئی ہیں، تاہم پارٹی نے ان کے ساتھ کسی قسم کے تعلق سے صاف انکار کیا ہے۔ کیدارناتھ شکلا نے کہا کہ میں انہیں جانتا ہوں کیونکہ وہ میرے حلقے سے ہیں لیکن وہ میرے نمائندے یا بی جے پی کارکن نہیں ہیں۔
