پاک نژاد فوزیہ جنجوعہ امریکہ میں ٹاؤن میئر منتخب

واشنگٹن: پاکستان نژاد امریکی خاتون فوزیہ جنجوعہ امریکی ریاست نیو جرسی کے ایک ٹاؤن کی میئر منتخب ہو گئی ہیں۔غیر ملکی میڈیا کے مطابق پاکستان کے شہر چکوال میں پیدا ہونے والی فوزیہ جنجوعہ نے امریکہ کی ریاست نیو جرسی کے ٹاؤن ماؤنٹ لارل سے میئر منتخب ہو کر نئی تاریخ رقم کر دی ہے ۔ نیو جرسی اسٹیٹ کی خاتون رُکن اسمبلی و امیدوار برائے کانگریس کیرول مرفی نے فوزیہ جنجوعہ سے ان کے عہدے کا حلف لیا۔ فوزیہ نے اپنے ہاتھ میں قرآن پاک اٹھا کر ماؤٹ لارل کے ٹاؤن شپ ہال میں ہونے والی تقریب حلف برداری میں آئیں۔ تقریب میں ان کے شوہر اور چاروں بیٹوں نے بھی شرکت کی۔فوزیہ جنجوعہ نے حلف اٹھانے کے بعد خطاب کرتے ہوئے کہا کہ مجھے تاریخ کی پہلی پاکستانی اور مسلمان خاتون کے طور پر میئر منتخب ہونے کا اعزاز حاصل ہوا ہے اور یہ مجھ سمیت تمام پاکستانیوں کے لیے فخر کی بات ہے ۔
فوزیہ جنجوعہ جو تعلیم کے شعبے سے بھی وابستہ رہی ہیں ان کے والد ادریس جنجوعہ کا تعلق پنجاب کے ضلع چکوال سے ہے ۔ایک غیر ملکی میڈیا سے گفتگو میں فوزیہ نے بتایا کہ ان کے والد کا تعلق چکوال اور والدہ لاہور سے ہیں۔ ان کے والدین 70 کی دہائی میں امریکا آگئے تھے اور یہیں انکی پیدائش ہوئی۔ انہوں نے امریکا میں ہی تعلیم حاصل کی اور ابتدا سے ہی عوامی خدمت کا شوق رہا ہے ۔نو منتخب میئر اپنے اس شوق کی تکمیل کے لیے غریب و نادار بچوں سمیت قیدیوں کو پڑھاتی رہی ہیں اور انہوں نے ایک غیرسرکاری تنظیم بھی قائم کی جس کے تحت کمیونٹی سروس میں فعال کردار ادا کیا ہے ۔سماجی خدمت کی شوقین فوزیہ جنجوعہ کی سیاست میں آمد اتفاقیہ ہوئی۔ وہ کہتی ہیں کہ ہماری ریاست کے گورنر کے ہاں ایک پارٹی ہو رہی تھی جہاں میری ملاقات ایک خاتون سے ہوئی۔ مجھے اُس خاتون نے بتایا کہ آپ میں صلاحیت ہے اور آپ اس شہر کی قیادت کر سکتی ہیں۔