بہارمیں اسکولوں کی چھٹیاں کم کرنے کا حکم واپس

پٹنہ۔ بہار حکومت نے اساتذہ کی چھٹیاں رد کرنے اور چھٹیوں میں کمی سے متعلق حکم نامہ منسوخ کر دیا ہے۔ اس حوالے سے زبردست احتجاج کے پیش نظر ڈائریکٹر سیکنڈری ایجوکیشن نے چھٹیوں میں کمی کو رد کرنے کا حکم جاری کر دیا ہے۔ دراصل ستمبر سے لیکر دسمبر ماہ تک اسکولوں کی چھٹیوں میں بڑی کمی کی گئی تھی۔ بہار میں ٹیچرس یونین نے اس پر احتجاج کیا تھا۔ اپوزیشن نے بھی نتیش حکومت کی تنقید کی تھی ۔
بہار کے سرکاری اسکولوں میں چھٹیاں کم کرنے کے حکم کے خلاف کافی احتجاج ہوا، جس کی وجہ سے بہار حکومت پر دباؤ دیکھا گیا۔وزیر اعلیٰ نتیش کمار نے خود پہل کی ہے اور چھٹیاں کم کرنے کا حکم واپس لے لیا ہے۔ انہوں نے فوری منسوخ کرنے کا حکم دیا تھا۔ ٹیچرز ڈے کے موقع پر احتجاجی مارچ کے پیش نظر یہ حکم پہلے ہی واپس لے لیا گیا ۔ اس میں اس سال ستمبر سے 12 چھٹیاں کاٹی گئیں تھی۔بہار کے محکمہ تعلیم نے 29 اگست کو حکم جاری کیا تھا۔ اس میں رکشا بندھن، جنم اشٹمی، چھٹھ، دیوالی، درگا پوجا اور جیتیہ جیسے تہواروں کی چھٹیاں رد کر دی گئیں تھی۔ بی جے پی کے ساتھ اساتذہ یونین نے بھی محکمہ تعلیم کے اس حکم کے خلاف احتجاج کیا تھا ۔
محکمہ تعلیم نے کہا تھا کہ تعطیلات میں ترمیم اسکولوں میں زیادہ سے زیادہ تعلیم کو یقینی بنانے کے لیے کی گئی ہے۔ پیر کو محکمہ نے دو لائن کا حکم جاری کرتے ہوئے کہا کہ 29 اگست کو پرائمری، سیکنڈری اور ہائیر سیکنڈری اسکولوں میں چھٹیوں سے متعلق حکم نامہ منسوخ کیا جاتا ہے۔